Che fada....
reposas....
cantande sa terra
e in pojos de lunas
ispricas sa cara
c’allattat su tempus areste.

Tattaja de sinu
s’amentu non morit
su primu alimentu has porridu
cantande sos muttos anticos
che rosa‘e padente chi hat presu
a cadena su coro‘e sos fizos.

Che rosa tue arrumbas…
in mesu sas frinas isortas
chi acchirran e mudan sa terra
cossolu de mammas mundanas
punidas dae iras de chelu
sos boidos crapicos has bistu
pedinde perdonu a su tempus.

Fuida ti ses...
in oras d’attarzu
c’han tintu de brunzu
sas predas de s’anima
e fizos de titta ti chircan gal’ora
in prueres d’ammentos
allegan in mesu s’iscuru.

Fuida ti ses...
in trenos de chelu
biazande in su tempus chi bramat su eranu
e frores de seda ti chircan che mamma
frorinde in sa tula‘e su sole.

Chin abbas de luche
pinzellos de sinu e d’amore
t’han tintu de groria
e ti ponet a luche in sa losa unu frore.

Fuida ti ses…in mesu su tempus chi curret
porrinde cuss’urtima titta
chi tessit sa neula interi chimeras anticas.

Mensione d’onore premio Berchidda 2015