Pupadas d’iscuru e timòria
de furesi bestidu ana sas nues
chi colan apeigande sas copertas;
tancas de prenare
chin sèmenes maleitos son chircande
ue su tràsidu crescat
allupande de s’òmine sos bisos.
Bòida ‘e tzertesas sa terra
ausente e bòidu su chelu.
In sa ventana
d’abba pròina iscoitzant sos colovros
che-i sas làgrimas mias isticchidas…

S’illusione
de torrare a naschire
impare a sos chintales:
frorit a sero e morit a manzanu
in s’oje de faddinas
chi sos ìmpitos ligant
cando su passu debadas illestro:
ca deretu l’isàrchilat s’ostinu.

In s’ispinosa fossa ‘e sos leones
chin ispuntada lepa
gherrat s’anima mia
e amparada de un’iscapulàriu
chircat galu sa vida
chi d’esser galu vida
pèrdidu at su seru;
sa morte
a dònnia passu l’assustrat.

Iseto
chin su sole in sa fronte
chin su sole in su coro…

Sezione B - 1° premio - 30° Concorso di poesia in Lingua Sarda “Sant’Antoni de su o’u” - Mamoiada 06 Marzo 2021