Tempos Feos
di Antonio Piras

Pro ch’aberzat sos ojos sa pianta
isetamos chi torret a favore
su tempus… e su sole, su calore
acumpanzen sas dies beraninas
allegritande montes e marinas,
colorinde sa terra totacanta.

Nòdidas dies de Pasca ‘e Abrile
cando chi su Signore est in sa rughe,
cando disizas de bier sa lughe
ma sas nues ammuntan sas aeras,
cando t’arriscas in sas camineras
sena connoscher mandra ne cuile.

Isetande chi torret su ‘eranu
a cheghentare terras e cussolzas,
istringhimos ligatzos e chintolzas
po mantenner pigados sos caltzones
e totus sos chi semus, a masones,
ponimos fatu a su distinu umanu.

Poberos nois, poberos pastores,
sos chi tenimos “sa robba” famida!
Mìseru chie faghet s’atrivida
illonghiande su passu prus de s’anca:
chi si furriet a dresta o a manca
at a bier dogn’ue inneddigores!

Però non tocat mai de s’arrimare
ca sos anzones cheren acudidos!
Si los trascuras abarran famidos!
An’a crescher rachiticos e lanzos!
Si non tenen peazos e afranzos
fortzis s’annada no l’an’a colare!

Ma su Signore est torrad’in vida,
coment’a narrer chi nudda non durat!
Si una die su sole si oscurat,
unu crasa si faghet pius bellu,
coloridu cun tintas de pinzellu
chi paren nande a dognunu: “Ischìda”!

**********

Si fin’a oe sa pranta non fiorit
cheret narrer ch’ancora no est in muta.
Isetamos un’ater’un’iscuta.
S’isperantzia est s’ultima chi morit!