Oh Terra, amada terra, terra mia;
mama amorosa, bìdriga e terrore
isvèlami ’e su tempus benidore
sos arcanos segretos, su destinu
de custos fizos tuos in caminu
sena lughe peruna e sena ghia.

Cun temporadas, trìmmulos e fogu
chi da s’intragna tua nos pressighint
mustras chi lestras mudant e s’impighint
sas pagas dies de sole e recreu:
nara pro cale dannu grave e feu
nos ses brivende ’e dogni disaogu.

“Sos muntonalzos mi pudint s’aera
e bogant a marranu ogni fiore;
erbas e frutos mancant de sabore
e su puzone grisat sos trainos;
chessas e ruos coberint sos caminos,
logos amenos fatos a bisera”.

“Nde lompent tempos feos si sighides
cun cussu amore faltzu chi mustrades
cando in bandelas pintas bos parades
a meighina de sos males mios:
marcias, passizos e boghes a rios...
solu ’e prennetos ma no mi pulides!

“Cal’istrada ti mustro in cust’iscuru
si dogni lughe m’azis istudadu:
pro cussu amore chi bos apo dadu
che dogni mama rispetu pretendo
e si mi mancat, astrada l’intendo:
famene e morte bi sunt de siguru

Amada Terra s’est custu su dolu
t’apo a donare carignos d’amore:
as a torrare bestida ’e lugore
infiorada de rosas e lizos
pro chi serenos ti torrent sos chizos
sena tristuras e ne disconsolu.

Pro me ti pedo cand’’enit sa die
de mi drommire pro s’ùltima ’olta
custa carena mi chelzo regolta
nuda in sa terra, abbratzendemi a tie.

2° premio alla 23ª edizione del Premio di Poesia in Lingua Sarda “Sant’Antoni de su o’u” di Mamoiada