Terra 'e passagiu
de Antonio Piras

Mira ch’in terra che ses de passagiu
e nudda ti che leas a cudd’ia.

T’an’a passare gana e bramosia
chi de sa udda prenu an sa funtana,
t’an’a passare bramosia e gana
chi sa funtan’an prenu de sa udda.

Mira ch’in terra che ses de passagiu
e a cudd’ia ti che leas nudda.

No un’abbunzu, unu pilu, una tudda,
solu de pruer impreas calchi punzu,
no unu pilu, una tudda, un’abbunzu,
solu de pruer calchi punzu impreas.

Mira ch’in terra che ses de passagiu
e a cudd’ia nudda ti che leas.

De suores, matanas e peleas
in viagiu ti jughes sos colores,
de matanas, peleas e suores
sos colores ti jughes in viagiu.

E nudda ti che leas a cudd’ia:
mira ch’in terra che ses de passagiu.

Impara bene totu su messagiu
ne una perra impites a drotu,
impara bene su messagiu totu
ne a drotu impites una perra.

E nudda ti che leas a cudd’ia:
mira ‘e passagiu chi che ses in terra.

Cheres ingrassare aferra-aferra,
paret chi non ti des acuntentare,
aferr’aferra cheres ingrassare,
paret chi cuntentare non ti dese.

E nudda ti che leas a cudd’ia:
mira ‘e passagiu ch’in terra che sese.

As’a esser salvadu conca e pese
a finitia, si bene as operadu,
conca e pese as’esser salvadu
si as bene operadu, a finitia.

Mira ch’in terra che ses de passagiu
e nudda ti che leas a cudd’ia!

(Menzione d'onore al Premio “Lùvula ti canto 2011” - Lula, 27.08.2011)