TERRA, TERRA CARA
Luisa Scarpa Chessa

Terra d’amores e de passiones
e de tramontos de sol’e de fogu,
sas auroras dulches de su logu
profumadas d’aranzos e limones.

Sa sinfonia tua est sa paghe
c’adornas preziosos sos gioiellos,
e sa cultura tua sun modellos
chi regalan sos dechidos nuraghes.

Fiores e colovros de su campu
in su ‘eranu pasidu fecundu,
su chelu biaittu, verecundu,
e sos isteddos de oro biancu.

Su clima tou infinida puresa
sun de sa terra nostra gloriosa,
cun s’iscogliera tua maestosa,
su mare smeraldinu ite bellesa.

Birdes pasculos sanos de Sardigna,
sos chercos seculares de su monte,
su limpidu eternu orizzonte,
pastores e massajos, zente digna.

Isola cara sos tuos bonos fizos
ispartos in su mundu pro campare,
ogni fadiga ischit azzettare
poi si morin sos sanos disizos.

Da-e custas ignobiles feridas,
sa zente de sanare hat un ispera,
pro chi torret a s’isola fiera
zerta d’haer sas operas cumpridas.