Tessidores chi tessin a s’acua
in su telarzu ingratu ’e su sentidu,
e sos filos chi ponen in s’ordidu
sun tiritiri de ludu e de lua
chi solamente telos de antua
poden bessire a tessinzu finidu.

Tessidores chi tessin sas bideas
in su telarzu rantzigu ’e su coro
chi pro s’ordidu ’e s’interessu insoro
imprean tramas d’anzenas peleas,
e pro cuare sas maganzas reas
tessin fressadas in color’’e oro.

Cun filadu ’e paraulas massissas
tessin lentolos de cumbenientzia
in su telarzu de sa sufferentzia
de animas in rughe crutzifissas,
e cun su tèssidu ’e falsas prommissas
covaccan sa bruttura ’e sa cuscientzia.

Tessidores de trampas, faularzos,
chi de s’umile zente s’aprofitan,
e pro li dare afficu non duritan
d’ordire e tesser ingannos dannarzos
ca sas tramas ch’han post’in sos telarzos
sun de ispera leca e... s’isfilitan.

Ma cun s’ispola ’e su podere a tesser
sighin, de ingiustitzia sas tramas
pro appagare disizos e bramas:
cunvintos pro dirittu ’e si meresser;
a faccia ’e chie non podet resesser,
de famine a istudare sas fiamas.

Cando dogni muitzu tessidore
chi tessit telos de disonestade,
hat a tesser rispettu pro su frade
cun su telarzu nobile ’e s’amore,
hamus a bider su mundu in fiore
profumadu ’e cubìda paridade.

Onestos tessidores: sos appittos
appaghen de sos chi pane no hana,
e in su telarzu ’e sa giustiscia umana
tessan pro tottu cabales dirittos.

1º Premio Sezione Rima - 23º Concorso di Poesia in Lingua Sarda - Mamoiada