Ti regalo fizu meu
Filomena Nieddu

Ti regalo, fizu meu,
chin sa naschida, su coro;
non sunu prendas de oro
su chi t'offerzo pro donu,
e ti cherjo haches padronu
de sa fide in d'unu Deu,

O pizzinnu 'e "custar dies",
t'imparo limbazu nou,
po ch'in su tempus tou
non t'hacates a disazzu
pro ch'in su longu 'iazzu
de sa vida, prontu sies.

E ti ponzo 'intro sar manos
sa billanza 'e su sentidu,
po ch'in tè hacan'affidu
sos chi son in cuntierra
chi sa vida in custa terra
la subrimen sos umanos.

Ti lasso s'avvertimentu
de sarvare sos puzones,
cand'intònana cantones
in sa' limpidas aeras
a s'alimentu isperas
'intro su coro cuntentu.

Chi l'affrontes custa vida
chene perunu lamentu,
e fissa su pensamentu
pro chi sempre ti cumportes
premurosu, e chi cunfortes
chie hat s'anima verida.

Solu tando sa cussenzia
ti det rendere serenu,
cando su dolor'anzenu
er missione d'amore:
tando finzas su Segnore
ti det usate clemenzia.

(Nuoro)