Tialleddas de paperi
di Vincenzo Pisanu

(is murus pastissaus de domu mia)

Tialleddas de paperi
appicadas in is murus,
disinnius e pinturas coloridas,
giogus e fantasias de criaduras
fattus cun ogus lìmpius de innocenzia
e tiradas de lapis in sa mesa.
Itta bellesa!...
Centu coloris. Celus e maris
domus, matas e froris
impari a s'imprenta de s'amori
appoddàda pendipendi in is paretas.
Murus de domu pastissaus de netas.
Domu mudada, domu stimada.
Domu pintada de colori
domu prena di amori
e de sentimentus bonus,
domu cun cantus e sonus
de paxi e de allirghia.
Custa est sa domu mia
candu arròlliu arròlliu apicadas
o in sa mesa, o in terra spainadas
agatu centu pinturas in tialleddas
criadas de s'amor'e is nettixedas
po mimi, po sa nonna, po is parentis,
fattas cun is pastissus innozentis.
Hia a podi' pigai centu pinzellus
po arrangiai is murus pastissaus,
po mudai is coloris disinniaus
ma no hiant a podi' essiri prus bellus
ca totucantu parit unu spantu,
e dogna tiràda de lapis, dogna colori
parit chi in coru abbrandit ogna dolori
e chi s'anima si bistat de cuntentu
di amori, de paxi e sentimentu
chi assimbillat casi a sa biadesa.
Itta bellesa!…
Su biri itta hant fattu is nettixeddas
pastissendimì' is murus e is tialleddas.