TILINGIONES!

(1° Prémiu a su VII^ Cuncursu Nassionale de Poesia Dialettale “ROMA OGGI” – Medàglia d’oro de su Presidente de sa Repùbblica - Roma 1978-79)

Tilingiones semus, tilingiones ebbia,
cravados in custa Terra ‘e calarighes,
ch’àndana feri-feri, che upas malaittas,
peri calancas, pèlcias, mudejarzos
in chirca ‘e bi surzire calchi ‘uttiu
chi siat istuppinzu a isperas noas!
Terra sicca niune la neat!
Nois però ojos e suilcos
benosos los tenimos dae sempre
e suore e piantu
aundan che trainu manantiale
sas dies nostras, finas a las martzire!
Cale istintu nos ghiat? Cale istintu,
si chèrtana sos laores cun su sole
e nois los abbamos, notte e die,
cun su sàmbene nostru allentoridu,
cun bélidos de anzones argasadas
in ìscias de riu chena recattu!
Cale deus nos giuat? Cale deus
si a s’interinada solu appena
nos ammacculiamos
acchéssidos, isfattos,
a pes de sos Nuraghes chena tempus
chi pro a nois s’addultzin donzi sero
in su nos bìdere, che suerzos, siccos!
Sa sorte nostra est sorte ‘e tilingiones!
Dae tempos e tempòrios nos lu nésini
janas e iscurtones de Ichnusa
bessidos in sa notte
cun àccias de nìbaru in sas manos!
Surdos pedrales non los iscultemis,
ne appoi ‘e mill’annos bi creimos!
Gai sighimos, tottora sighimos,
azuridos
a nos affungare sempre ‘e piusu,
ca pius forte ‘e donzi tribulia
est sa rocchella nostra ‘e b’agattare
de paghe, prima o poi, unu lughinzu.

Antoninu Rubattu