Tormentu

Zarrat sa 'oghe 'e su entu,
e bulionat chirriolos de sorte,
in aeras de 'olos chen'ispera.

Lunas de fogu attuddadu
si caentan in chelos de nie.

Nues de pabilu ingroghidu
sun gherrende cun randine alluttu.

Buttios de braja incripida
han ilieradu istinchiddias de astrau.

Poi sa 'oghe 'e sa mutria
hat presu sas laras de sa notte.

Ma no pasat sa duda maligna
chi m'affianzat carre e sentudu.
e s'est cuadu s'asseliu 'e Morfeo
in pijas rujas de patimentu.

E creschet in coro s'affannu
de un'impuddile ancor'isteddadu,
pro annegare s'antigu dolore,
in mares serenos de asseliu.

Ma undadas de vanu isettu
si solven in lagrimas de sale.

Giovanna Maria Lai Dettori (Ozieri)