Torolo
di Antonio Piras

Sut’e unu chelu ‘e lughentes isteddos
s’oju meu s’arrimat incantadu
mirande sa bellesa ‘e su criadu
in chirca de nde ogare su segretu
de cuss’arcu celeste gai perfetu
chi a lu contare no tenzo faeddos.

Pensamentosu po cussu tesoro,
de s’antigu misteriu presoneri,
sa conca mia andande ilberi-ilberi
proat a s’ispiegare cust’arcanu
chi dat ispantu a dogn’essere umanu,
ponet in paghe s’anima ei su coro.

Cuntentàda sa vista, a s’origa
lena mi ferit sa muida ‘e su mare,
cuddas undas chi s’iscuden a pare
cun su motu continu anda e torra,
s’isprumatzu m’infundet sa petorra
e m’acumpanzat che musica amiga.

Cantan sas tzintzulas a serigheddu
ispidientande su logu bugiosu
e isetande s’ora ‘e su reposu
paret sa conca mia illebiada,
muidas e sonos sun che serenada
chi mi faghet torrare a pitzinneddu.

Ammajadu nde so’! Tra chelu e mare
e sos fortes alientos de sa terra
frores non b’at e ne prantas de serra
chi potan agguantare s’iscommissa,
sos profumos de chessa e de alchimissa
mi nd’allegran sas pinnas de su nare.

Meraviza ‘e Sardigna! Unu chizone
ue si reposat dogni carre istraca,
ue sa natura, mudada che traca,
mustrat, pomposa, su mezus chi tenet,
ue dogni cosa, fiera, mantenet
sa ‘este sua e s’antigu zipone!