Torra!

Beni da ‘ ispiralladas
de luches de chelu
cantannemi durches anninnias.

Dae canno sono mortos
sos beranos, chene vrores
ne cantos de nidos, ne
promissas de pasca ‘e aprile,
hapo tantu bissonzu ‘e las intènnere.

Torrade a domo armoniosas melodias,
a m’incantare su coro inchietu
in custa notte isporosa de iberru.

Torra!

E in sos pilos canos, ponemi
sos carinnos lepios de sas manos
pro sonniare tempos anticorios
de pitzinnia ‘e felitzidade.
E comente isteddu’e bona sorte
su cantu tou de paristòria
m’ata essere luche de ispera
in custas nottes meas de angustia.

Ma est tottu vanu s’isettu!
tue non torras prussu, comente
sos beranos meos fozidos.

Sono addobbanne forte in s’anterile
chin boches airadas de tzilioccas
sos bentos abrinados de s’iberru
e mi sono iscancanne su coro
chin toccos impressidos de ustinu.

Ma tue anima mea, chin cantos
de ispera in su pettus
galu non ti rassignas
e in dirmajos de sonnio pizzinnos
galu ses bramanne
luches de amore, mazines
de tempos luminosos,
in custa notte ‘e trumentu;
Zardinos froridos de amorosas
rosas in su mese de maju,e
profumos de cannidos lizos.

Chin toccos impressidos de ustinu
E da ispiralladas de rujos chintales
che isposa vestida, est acchirranne
ballanne unu dillu galana,
istennennemi sa manu
pro mi che piccare
ispantada de m’accattare serenu
chin su risu in sas laras
in mesu a custu sacru terrenu dolore.

(Minzas in s’urtimu istante ‘e sa bida amus galu sa possibilidade de mudare s’ustinu. P. Delogu).

3°premio sez. a tema e verso libero “ Sevadore Bertulu” Prèmiu Logudoro Ozieri 2015