Torro grassias
di Antonio Piras

a sos amigos Luisi Ladu e Peppe Concas

A Luisi po “Pitzinnos minores”
e a Peppe, “Funtana coronesa”,
da sa terrina dimora iscanesa
lis dao grassias, mèritos, onores!

In Bolotana b’at amigos bonos
chi connosco, apretzio e ammiro
e comente a cust’aria chi respiro
los istimo e los port’a intonos.

Ca m’an dadu sa intrada cun afetu
de los tenner amigos mi nde onoro,
m’an abertu sa janna e su coro
cun sinnos de amistade e de rispetu.

De s’amigantzia insoro so’ fieru,
afabiles, gentiles e cumpridos,
dae cando los apo connoschìdos
lis apo dadu istima e cunsideru.

Semper in bonu, Luisi, tue sias,
non ti manchet ne fortza ne virtude:
de continu t’assistet sa salude
po ponner frenu a sas marturias.

Cun Maria afrontes su ‘iazu,
fin’a chentu ti fetat cumpagnia
e dae susu …s’atera Maria
in dognora ti siet a costazu.

E tue puru, Pe’, tènedi contu,
chi su Signore ti muntenzat sanu:
mandami calchi rima, da Iscanu
a ti risponder deo ap’esser prontu.

Custa cantone mesu improvisada
bos siet de bonumore e de recreu.
Retzide, totus, su saludu meu
cun d’unu ‘asu e un’abbratzada!