Tott’est mudadu ‘e luna …
di Gigi Angeli

Tott’est mudadu ‘e luna in sa nottada!
sos pessos portant su matessi estire…
s’alenu puru ‘e pratta at s’inchelada
e pasada in sos panes de fumatza
ch’in su bighinu ‘istentat a porrire
a sas umbras su belu pro caratza.

Mintzidiant lugores sa carena
e chenza frittu bogat s’atzuddida;
a passos lenos bandulo in sa rena
de s’andaina ‘eretta pro su mare:
inzinnit pasidu a su sonni ischida
ma biu restat cun su murmuttare…

a s’atta abbojo e semus a faeddu
mentres s’iscuru accostat sos fundales;
los chingo tottu torrende piseddu
cun s’isterrida manna ‘e fantasia:
cue “murmuttu” e deo semus gales
in su cuntrestu mudu ‘e mesu ‘ia…

e s’ammaju si sutzat sos affannos
lassendemi a podere de s’ispera:
de bramas noas mi porrit sos pannos
e m’allughet in cara s’ura noa;
puru lassendela a colore ‘e chera
pro no frimmare cun lugore a coa;

ma mi l’agatto puru in sos sentidos:
son diligos ma prontos pro bolare;
e bolana in disitzos no cumpridos
ca pro sa notte no benini a bonu…
cun crasa forsis los potto agabbare!?!
sisse sa sorte mi leat in donu…

mudadu ‘e luna resto in sa nottada
e de mudine infustu so ‘e su sonu;
s’immensu sero, chenz’esse padronu
de cussa fria… ch’est jà cabulada!…

07.11.2010

Signalassione in su cuncursu Remundu Piras de Villanova Monteleone