Tres meses
(trintases)

Tres meses e pius in pensamentu
m'agato ca non tenzo pius risposta
de connadu meu tantu amadu.

In pena mi agato e so turbadu,
che moro, che maltrato in cadena
ca mi agato turbadu e in pena
che in cadena che moro maltrato
in pena e turbadu mi agato
so passende su tempus chin anneu.

Tres meses e pius in pensamentu
m'agato ca non tenzo pius risposta
de tantu amadu de connadu meu.

Como prego a santos e a Deu
chi che torret allegru canto a domo
a santos e a Deus prego como
chi che torret a domo allegru canto
como prego a Deus e a santos
chi torret sanu comente est tucadu.

Tres meses e pius in pensamentu
m'agato ca non tenzo pius risposta
de tantu amadu de meu connadu.

Ja un'annu est chi m'ada visitadu,
in Roma in camarada senza dannu,
chi m'ada visitadu est ja un'annu
sena dannu in Roma in camarada
ja un'annu est chi visitadu m'ada
chi est dormidu cun megus a costa.

Tres meses e pius in pensamentu
de connadu meu tantu amadu
m'agato ca non tenzo pius risposta.

Una 'idea turbada mi s'est posta
de sa vida passada a mente rea
ca mi s'est posta turbada una 'idea
a mente rea 'e sa vida passada
ca mi s'est posta una idea turbada
in coro su piantu mi retenzo.

Tres meses e pius in pensamentu
de connadu meu tantu amadu
m'agato chi pius risposta non tenzo.

A bos cantare dolente bos benzo
ca no isco comente at a 'istare
ca dolente bos benzo a bos cantare
c'at a 'istare no isco comente
a bos cantare bos benzo dolente
a sigundu su versu chi bos trato.

Tres meses e pius in pensamentu
de connadu meu tantu amadu
chi prus risposta non tenzo m'agato.

Chi siat presoneri eo lu fato
e prego volonteri a sa Maria
e lu fato chi presoneri siat
a sa Maria prego volonteri,
e lu fato chi siat presoneri
ca mancat totu cussu regimentu.

De connadu meu tantu amadu
m'agato ca non tenzo pius risposta
tres meses e pius in pensamentu.

Su cunfortu e su briu apo in trumentu
ca no isco s'est biu o si est mortu.
Su briu apo in trumentu e su cunfortu
ca no isco s'est mortu o si est biu
apo in trumentu su cunfortu e su briu
dae cando est sucessu cussu abbusu.

De connadu meu tantu amadu
m'agato ca non tenzo pius risposta
tres meses in pensamentu e piusu.

Preghende so a Maria e a Jesusu,
mancari in tribbulia esser vivende,
a Maria e a Jesus so preghende
d'esser vivende mancari in tribbulia
so preghende a Jesus e a Maria
de che torrare sanos totas trese.

De connadu meu tantu amadu
m'agato ca non tenzo pius risposta
in pensamentu pius de tres meses.

Pilosu, si mi cres, a tie bramat
de che torrare a abrazzare a mama..

Sebastiano Pilosu, Punta Armeni 18/02/1918