pro Rosaria Morta Zovanissima.*
(iscritta in su mede 'e lampadas 1937)

Rosa fisti de lumene e figura
ite peccadu a esser guastada
sa cara in custa terra mortuaria

In sa tumba deposta este Rosaria
Ca fit celeste sabia columba
Rosaria deposta est in sa tumba
Ca fit columba sabia e celeste
Rosaria in sa tumba deposta este
Chi cunbattinde perdidu at sa gherra

Rosa fisti de lumen’e figura
Ite peccadu a esser guastada
sa cara in cussa mortuaria terra

Su coro ada divisu perra perra
De improvvisu a sos de domo issoro
Divisu perra-perra ada su coro
A sos de domo issoro de improvvisu
Su coro perra-perra ada divisu
C’an perdidu sa prenda pius cara

Rosa fisti de lumen’e figura
ite peccadu a esser guastada
in cussa terra mortuaria sa cara

Aite die de piantu amara
Chi tottu cantu sentidu ana a tie
De piantu amara ite die
Ca a tie ana sentidu tottu cantu
Aite die amara de piantu
Chi mai ada benner cancellada

Rosa fisti de lumen’e figura
Sa cara in cussa terra mortuaria
Ite peccadu a esser guastada

Nemancu a sos vintannos arrivida
cambiadu an sos pannos de biancu
Nè arrivada a sos vint’annos mancu
De biancu cambiadu ana sos pannos
Ne mancu arrivada a sos vint’annos
Si estin cantu oscuru podet esser

Rosa fisti de lumene e figura
sa cara in cussa terra mortuaria
Ite peccadu guastada a esser

Sas coronas fatu t’ana tesser
Ca fisti ritrattu de figura bonas
Fattu ti ana tesser sas coronas
Ca de figura bonas fis ritrattu
Sas coronas tesser t’ana fattu
Cun pramas chi sa bara an’adornadu

Rosa fisti de lumene e figura
Sa cara in cussa terra mortuaria
A esser guastada ite peccadu

Su giardinu cumpretu as’ispazzadu
Ca fis’oggettu e su Deus Divinu
ispazzadu cumpretu as su giardinu
Ca de su Deus Divinu fis oggettu
Su giardinu ispazzadu as’a cumpretu
De geniosidade e d’ermosura

Ite peccadu a esser guastada
Sa cara in cussa terra mortuaria
Rosa fisti de lumene e figura

Istella verdadera de s’artura
Isprigu de s’intera parentella
Dae s’artura verdadera istella
Isprigu de sa parentella intera
Istella de s’artura verdadera
De onestade e de bonu costumene

Ite peccadu a esser guastada
Sa cara in cussa terra mortuaria
Rosa fisti de figura e lumene

Non bastada a iscrive su volumene
Mancu a mie sa mente invastada
A iscrier sos volumenes non bastada
Mancu invastada sa mente a mie
Non bastada su volume a iscrier
Po ti poder cantare dogni cosa

Ite peccadu a esser guastada
Sa cara in cussa terra mortuaria
Già chi pagu durada ses vivente
Goses in paradisu eternamente

--------------------------------------------
* Custa poesia su biadu de nonnu l’aiada
iscritta po una netta, (fizza de sa sorre
de sa muzzere), chi si nariada Lostia
Rosaria Virginia, naschia su 26.08.
1917 e morta su 24.06.1937 a s’edade
de 19 annos, in sa menzus gioventude.
--------------------------------------------
A NONNU BERNARDU
Nonnu, in cust’amena poesia
mustras arte e mannu talentu
puru fessi triste su mal’eventu
las pintada cun tanta fantasia
a Rosaria as fattu sa curtesia
cun Zuannangela e babu Larentu
ambarduos saludo in cust’itoria
a bos connosche in santa gloria.

Dino Piras, 03,01,2022