Trinta Sese Antigu a s’amigu Luisu Ladu de Bolotana
di Serafino Putzolu

(Amentos e novas)

De nou su motore in Trinta Sese
Luisu in custa zona ponzo in motu
Ca novas mias ti fatto a ischire

S’emigradu a s’andare e su enire
S’este cun su viaggiare abituadu
A s’andare e su enire s’emigradu
Abituadu s’este cun su viaggiare
S’emigradu a su enire e s’ andare
Cun su viaggiare abituadu s’este
Ma su cantu non est viaggiu celeste
S’affrontada de sa vida tantas provas

De nou su motore in Trinta Sese
Luisu in custa zona ponzo in motu
Ca ti fatto a ischire mias novas

Si a su coro trese venas rinnovas
Sese in s’ispera de dies serenas
Si a su coro rinnovas trese venas
In s’ispera e dies serenas sese
Si a su coro rinnovas venas trese
De dies serenas sese in s’ispera
Cantande a botorina o furistera
Si b’à poetas chi bene mi adatto

De nou su motore in Trinta Sese
Luisu in custa zona ponzo in motu
Ca novas mias ischire ti fatto

Zertu s’etternidade non cuntratto
Ca seo in santidade pagu espertu
S’etternidade non cuntratto zertu
Ca seo pagu espertu in santidade
Zertu non cuntratto s’etternidade
Ca in santidade pagu espertu seo
Ma ca sa vida est’una gustu leo
In terra prima e andare in Paradisu

Ca novas mias ti fatto a ischire
De nou su motore in Trinta Sese
Ponzo in motu in custa zona Luisu

Ma prima de tennere s’ultimu avvisu
Sa rima sarda m’aplico a mantennere
Ma prima s’ultimu avvisu de tennere
M’aplico a mantennere sa sarda rima
Ma s’ultimu avvisu e tennere prima
Sa sarda rima a mantennere m’aplico
Richesa in poesia mai non crico
Nen glorias immortales a corona

Ca novas mias ti fatto a ischire
De nou su motore in Trinta Sese
Luisu ponzo in motu in custa zona

Sa zente amiga onesta e bona
Faghe festa in tottue sena briga
Sa bona e onesta zente amiga
Sena briga in tottue faghe festa
Sa bona e amiga zente onesta
Sena briga faghe festa in tottue
Chi siada in Parigi o puru incue
Mai chimbucana in caminu trotu

Ca novas mias ti fatto a ischire
De nou su motore in Trinta Sese
Luisu in custa zona ponzo in motu

De bos aere bidu ocannu e connottu
D’amos batidu bonu amentu mannu
De bos aere bidu e connottu ocannu
D’amos bonu amentu mannu batidu
Ocannu de bos aere connottu e bidu
D’amos batidu bonu e mannu amentu
Cuntentos de passare unu momentu
Cun sas caras signoras tott’as trese

Luisu in custa zona ponzo in motu
Ca novas mias ti fatto a ischire
De nou su motore in Trinta Sese

Su tou bellu incantadu paese
Paret de Giotto modellu pintadu
Su tou bellu paese incantadu
Paret de Giotto pintadu modellu
Su tou incantadu paese bellu
Paret modellu pintadu de Giotto
Tantos Poetas b’à naschidu notto
Cun glorias mannas de altu valore

Luisu in custa zona ponzo in motu
Ca novas mias ti fatto a ischire
In Trinta Sese de nou su motore

Da cuss’altura osservas s’isplendore
S’abba pura de S’Omodeu in riservas
Da cuss’altura s’isplendore osservas
De S’Omodeu in riversas s’abba pura
S’isplendore osservas da cuss’altura
In riservas s’abba pura e S’Omodeu
E in prusu Ardaule tottu intreu
Bies de fronte in sa punta distinta

Luisu in custa zona ponzo in motu
Ca novas mias ti fatto a ischire
Su motore de nou in Sese Trinta

Prima e finire de manu un’istrinta
Bos prego de rezzire dae lontanu
Prima e finire una istrinta e manu
Bos prego dae lontanu de rezzire
Una istrinta e manu prima e finire
Dae lontanu de rezzire bos prego
S’amicia nostra a tottus bos intrego
Fattende a custos versos sos congruos
Nois duos saludamos bois duos

Courbevoie 24/10/2009