Mancant rodas de carru in s'impedradu
traidu dae zuo prenu e suore,
saccos de lana ue bundit laore,
creschid'in campu como abandonadu.

Mancant sas boghes de sos zovaneddos
chi terracuzant in s'adde luntana
mendula frisca e ab'e funtana,
cun contos bezos e nunzios d'aneddos.

Mancant ischelios in sas contonadas,
de pizzinneddos chi zogan a trumas,
fragu e zigarru essit si lu fumas,
a fog'a intro c' andat a pampadas.

Mancat sa zente,mancat s'ighinadu,
sas chigulas e finzas sa friscura,
carrelas boidas prenas de calura
in custu logu chi s'est irboidadu.