Tue pedis amore

di Benito Saba (2005)

Tue pedis amore in s'oru 'e gianna
de s'anima mia in pelea manna,
passentziosu pianu pianu tzocchende
su tempus netzessariu a m'ischidare...

Frionzu e bambu, pro contu meu vivende,
chervu e a su nudda currende fattu,
sa vida a Tie non chería dare.
Volástigu e ojanu, bóidu, attattu
de umbras fartzas de su mundu vanu,
dae domo, loccu, mi che fia andadu
semper pius attesu, cane rundanu…
Pérdidu fia, ma Tue m'as chircadu;
" Amigu! ", propiu gai Tue m'as giamadu...
Paráulas m'as in coro remunidu,
chi sun de vida, veridade e via.
Nudu e lanzu a domo so recuidu,
cansu e sonnidu, ma fora 'e majía.

Su coro 'e pedra giámbami, Segnore!
S'abbratzu 'e su perdonu dona a mie
e aissegus a Tie 'enza cun ardore;
e non pense potente s'ala mia
pro bolare in altu chentza a Tie
binchende s'egoismu e s'uffanía:
s'amicitzia cun Tegus non est bera
si paris non est forte e sintzera
cun sos ómines tottu chi umpare
amus retzidu su donu 'e sa Terra
pro la manizare e l'amparare,
vivende in paghe e revudende gherra,
frades chi semus, fizos de s'Amore!

Cada die eo Ti cherzo abbojare
visitende a… fulanu, 'ighinu meu,
maláidu e solu, custrintu a su lettu,
pro li dare cunfortu e illongare
un'arrejonada chene apprettu,
chi 'alet pius de su mundu intreu.

Non Ti torre in timore servile
s'amore chi mi pedis in giannile.
Mira, abberzo sa gianna cun fiamore:
intra in domo Tua, imbara, Segnore!

Benito Saba

Questa poesia ha conseguito la Menzione d'onore - Sezione Poesia senza rima - al XVII CONCORSO DI POESIA SARDA - ACLI DELLA SARDEGNA - 2005