Tue Santa Lughia
di Vittoria Cazaghe

Pro cust'amigu chi ischit iscultare
A boltas cando so de malumore
Es che unu frade pienu de amore
E tentat de mifagher deviare.

Ed es pro issu chi chelzo pregare
Ai custa Santa ches meda potente
Comente lughet anima e mente
Ti prego cust'amigu de sanare.

Pro issu siat finida sa traschia
Ispuntede lughende s'aurora
Dai cust'oscuridade ogalu fora
Cha tue solu bi podes, o Lughia.

Contenta dia essere e fiera
Si su desizu si diad'averare
De ider luna, istellas, sole e mare
Istiu, ierru, manzanu e sera.

Issu a peldidu sa lughe luminosa
Chi li fid'unu tempus de guida
Poi chi cussa lughe est'isparida
Bidet cun ojos de sa sua isposa.

Mai perdas su filu e s'isperanzia
Puru si como vives'in s'iscuru
Has meda donos istande siguru
Chi ater n'he sentin sa mancanzia.

Chelzo preghende augurar'a tie
De ider sas bellesas de s'aera
Su sole candes colende sa sera
Chi tando in s'orizonte paret die.

S'aia de cristallu un'isfera
Su desizu a issa aia affidadu
Custu carru in chelu costelladu
L'aia fattu ider'istasera.

Su manzanu cando naschet s'aurora
E serentina cando es calende
Ches de milli colores luzzighende
Ue brilat su sole in sa dimora.

Menzione Associazione non Vedenti