1.
Ite dolore turtura innocente
ite turmentu e dura afflissione
su dolu tou a sa mia pessone
leanne l’est s’alenu e i sa mente

2.
Si non torras ridente, sa campagna,
rattristas e de luttu isparghet velu
nues nieddas si formana in chelu
siccas de sa allegria d’ogni intragna
torra ridente amabile cumpagna
e dae a custu coro affezione.

3
A sos coros chi colpis e chi feris
podes che balsamu, cunfortu torrare
torra chin su sorrisu tou a dare
sognos d’ispera in sas mentes c’aperis
pero si tue turtura preferis
dae solu a s’amore attenzione.

4.
In bellesa candore e in presenzia
che i sa tua non b’atta atteruna
disputare la des chin Sole e Luna
sa natura t’at dadu ogni licenzia
vinches Atena chin sa sapienzia
e su regnante anticu Salomone.

5.
Trattu galanu e simpatia vera
Prenda donosa turtura galana
Canno non rides pius no mi dana
Sinzu sas aes volanne in s’aera
Onzi colore de sa primavera
Superas tue in perfezione

6.
Sa oche tua sinfonica rima
sanat che meichina ogni piae
de sos coros amantes ses sa giae
cantu armoniosu e nota prima
si no t’intenno s’oju mi lacrima
e in tristrura su coro si pone.

7.
Cheres a vantu e onore giutta
pro cantu ses perfetta e ses dechida
ses alenenu e consolu de sa vida
chi cessat de sa mente ogni disputa
de piantu sos ojos tue assuttas
senna e sos tancados in prejone

8.
Si tue a s’amore pones alas
lassare non di deppo in munnu mai
mai ti lasso in munnu ca gai
chere su coro senza ideas malas
si tue a sa bellesa aggiunghes galas
vantare minne de chin sa rejone.

9.
Si tue no mi cheres coro amadu
e s’ amore pro te no mi dat fruttu
app’a esse che casteddu ruttu
chi su tempus a vintu e at domadu
chi pianghet affrantu e disdiciadu
vivenne in pena e tribulascione.

10.
Ma si a mie tue pones mente
su nidu ti preparo a fozzas d’oro
sos ramos chi intrizzo intro su coro
los fasco tottu de seda luchente
pro chi dolore no appas niente
semper piena de istimascione.

11.
Como la fino sa mea cantada
cesset ogni dolenzia e fastizzu
ascurta de su coro su cussizzu
si sa vida la cheres premiada
pro chi sias in benes montovada
mantene de su coro opinione

2013