Tzia Siedda est morta! A s'improvisu,
in s'ora chi sa morte l'at mutìda,
sentza dare fastizu, si est dormida
e luego est bolada in Paradisa.

Fin tres annos, ormai, chi sa vida
che l'aiat furadu su sorrisu (1)
e forzis intro 'e coro aiat dezisu
de si lassare andare consumida.

Fit fatta de atarzu 'e tempra antica,
non timiat ne fritu e ne calore
e mai at tentu pasu in sa fatica.

Aiat proadu palpidos d'amore
e pipinidas de fortuna amica,
ma prus de totu fit mama 'e dolore.
Como no andat prus lastra che bentu
a sas tancas famosas de Oreo (2),
in notes de iscuru e de turmentu,

E finzas in su Chelu penso e creo
chi non si daet pasu unu mamentu
pro sos motivos ch'immazino jeo.

Sa veridade est chi, acanta a Deu,
como at milli resones prò gridare:
"No istentes, Sennore, a ch'ischidare
cuddu malassortadu 'e fizu meu!" (3).

1.Dae cando su fizu est andadu in coma
prò unu inzidente istradale.
2. Su cuile de su fizu.
3. Su fizu est semper in coma.

Segnalazione Premiu Literariu "Gurulis Vetus" Padria 29 agosto 2009