Inoghe est ch’assaporo
su gosare ‘e sas oras
in sutta s’umbra sana ‘e sas ulias!
Mi consolan su coro
sas naes donadoras
de umbras pro sas blandas fortzas mias.

Cantos annos inoghe
l’appo infusta ‘e suore
sa terra a boltas àrrida e sidida,
cantas rimas a boghe
a crebu ‘e su dolore
si sun pesadas a s’acchid’acchida!

E bois, fraza-fraza,
cun sos rampos ninnende
mi mustrazis su fruttu ‘e s’ozu santu
ch’in naes traza-traza
mi fizis appaghende
sas fadigas infustas de piantu.

Chìbberas cun su pesu
de su fruttu divinu
pazosas bos ninnazis a su ‘entu.
Cun bois appo presu
ogni versu ladinu
e càntigos in oras de turmentu.

Cando sos mannos mios
bos an dadu dimora
fizis ozastru areste in sa foresta.
Sos annos sun sighios
ma creschides ancora
bellas che bajaneddas in sa festa.

Superbas e galanas
bos bido fioridas
dae s’altare umbrosu ‘e sa ‘etzesa,
e mi torran sas ganas
de bos dare cosidas
rimas in coro, che pane in sa mesa!.

App’a torrare ancora,
mancari a passu lentu,
pro bos impazosire, àlvures raras.
E cando arrivat s’ora
bos lasso, ma cuntentu
de bos aer amadu, ulias caras.

1° Premio Sezione A - Al Premio Biennale di Poesia in Lingua Sarda “A pes de Santu Padre” - Bortigali 2015

Motivazione del Premio
Bàrriu de sentimentu custu càntigu pro s’àlvure sagrada sìmbulu de vida in sas terras caras a su Mediterràneu, dae sas edades antigórias a oe. Su poeta at contivizadu tota vida sas olias suas e como gosat a su meledu de issas chi adduran bias pro unu tempus chene làcana. S’impitu de sa limba est semper dìligu in custu cantadore de sa terra sua, s’andanta de setenàrios e endecasìllabos est una música a s’orija e a su coro. (di Paolo Pillonca)