UMBE PASTURAS

Umbe pasturas sas terras son fritas
in s'istiu comente in jannagliu,
as solu deghe 'erveghes mannalitas
e ti contas abberu un'ervegagliu,
pro aer late bei cheret titas
nde 'ogas pagos litros a intagliu,
e si s'annada apenas ti 'enit male
no nde prenas de late unu tidale.

Ma dia cherrer chi milu ispieghes
prit'istas gai pelea pelea?
ma comente ti est bennida s'idea
de ponner fatu a custas deghe 'erveghes?
ch'as dinaris e terras no lu neghes
e potes aere una gama intrea,
ness'a su mancu tinde sodisfaghes
de cussos sacrifizios chi faghes.

Non naro de esser pastore de fama
comente sos Chiolos e Corraines
ma dia cherrer chi abberu ammaines
su cuile chin d'una bona gama,
a tretu de apagare tanta brama
c'as terras bonas chi bundan ferraines
e potes garantire addiritura
a una gama manna sa pastura.

E gai potes godire de totu,
de su chi sas 'erveghes poten rendere,
poi b'at una cosa de cumprendere
chi 'enis aprezzadu dae totu
ca lana e late chin casu e regotu
as pro provistas tuas e pro nde 'endere
e i sa peta a soddisfazione
godis e bendes in donz'istajone.

Ma! o amigu cumpati e perdona
si t'apo fatu s'osservazione.
Bae in bon'ora e chin benissione
ti che cumbines una gama 'ona
tantu de t'ammirare in donzi zona
cale pastore 'onu e campione
senza tennere invidia de nissune
de sos de Fonne, Orgosolo e d'Orune.

Luca Doddo (Torpè)