Caras mi sun sas oras
chi su gosu m’affranzat
e biu in pettus torrat su bramore
de connòschere ancoras
su tempus ch’accumpanzat
su viver nostru ‘e lughes pedidore.
E durche su sabore
de custa terra intendo,
cando muda, a sa cua,
de s’ermosura sua
sa mente mia prenat e cumprendo
d’esser de issa fizu,
ca mi mustrat amore e contivizu.

De su chelu faeddos
in sas nottes isculto,
de su mundu contàndemi s’istòria.
Fintzas in sos isteddos
a bìere resulto
s’imprenta prus arcana e antigòria.
Ma curtza est sa memòria
e non lompet attesu,
a su primu manzanu
chi capatze una manu
sas primas lughes nostras at atzesu,
in color’ ‘e s’incantu
chi cun su nudda at tintu tottucantu.

E de s’amore tou
a mie at fattu donu,
ca solu, innoghe, istare non podia.
De un’alenu nou
apo intesu su sonu
bintràndemi in su pettus che majia.
Tue, s’ispera mia,
in cust’andare intzertu
donosa m’accumpanzas
in s’àndala ube iscanzas
sas giannas chi su coro m’an abbertu
a dìligos sentidos,
como in sos ojos tuos recuidos.

Un nuovo respiro

Mi son care le ore
che la gioia mi abbraccia
e mi ritorna vivo in petto il desiderio
di conoscere ancora
il tempo che accompagna
il nostro vivere che luci invoca.
E il sapore dolce
sento di questa terra,
quando muta, segretamente,
della sua bellezza
riempie la mia mente e capisco
di essere un suo figlio,
perché mi mostra amore e premura.

Parole del cielo
nelle notti ascolto,
raccontandomi la storia del mondo.
Anche nelle stelle
riesco a vedere
l’impronta più antica e misteriosa.
Ma corta è la memoria
e non arriva lontano,
al primo mattino
quando abile una mano
ha acceso le nostre prime luci,
in colore della meraviglia
che col nulla ha dato colore a tutto.

E del tuo amore
a me ha fatto dono,
perché da solo, qui, non potevo restare.
Di un nuovo respiro
ho sentito il suono
entrarmi magicamente nel petto.
Tu, speranza mia,
in quest’andare incerto
graziosamente mi accompagni
nel sentiero dove schiudi
le porte che il cuore mi hanno aperto
a delicati sentimenti,
ora raccolti nei tuoi occhi.

27 luglio 2014

1° Premio alla 18^ Edizione del Premio “Seunis-Tiesi”- Sez. Poesia in rima – THIESI 12 ottobre 2014