E tra cussas che ponzu unu fiore,
simbulu de s'amore illacanadu
e de sos milli basos chi m'as dadu
in notes infinidas de amore.

Su nuscu de sa menta e de s'armidda,
ghiddostre, romasinu e de locasu,
chi m'amentan su primu ardente basu
cando di carignavo sa mamidda.

Su murmutu e sa oghe de sos rios,
ispantosu in s'ierru e bulluzadu,
o a s'orija apenas arribadu
in notes de mudore in sos istios.

Su fruscitu 'e sa tonca e de s'istria,
pro medas de disastros su sinzale,
ma pro mene, distintu e cordiale
cantas notes m'at fatu cumpanzia!

Un'istìza 'e luna ponzo puru,
non pro mirare sa sua bellesa,
ma ca no isco s'est totu craresa
inie, o b'at momentos de iscuru.

Rajos de sole, su chel'isteddadu.
Su bentu cando frusciad'in sa roca.
S'incantu da chi falat sa fioca
imbiancande totu su creadu.

De nepodeddos su risitu insoro
che ponzo pur'in sa bertula mia,
pro ch'in oras de dolu e de traschia
mi la caenten s'anim'e su coro.

Su 'olu bellu de sas mariposas
cando brinchitan dai ratu in ratu,
mi che cherzo leare puru infatu
chin sas ateras milli e milli cosas.

Duncas o Babumannu, beta 'oghe,
eo so prontu, so fodd'est pienu...
ma fin'a cando mi restad'alenu
mi las cherzo godire galu innoghe!