Elena tenet una rosa in sinu
issa la cantat faghinde faina,
andat galana caminu caminu,
tragat passentzia a pass'e reina.

Elena cosit a filu 'e cuntentu
meses e dies e tempus chi passat,
anima in manos, amore cumassat,
tundos e sìmula cun pane lentu.

Elena estit de fada, de frore
s'isteddu 'e sero, c'amorat a fura
li curret in benas, friscu lentore,
ispantu che lampu in notte che tura.

Elena ninnat pruine 'e isteddos
bànzigat, bolat, rodiat che ae.
Su tou est su chelu, libera bae,
prima 'e sa note de bisos nieddos.

Elena nuscat su risu,su gosu
tròddula tròddula in sa caminera,
frimu su bànzigu, nues in s'aera,
pèrdidu, chircat su coro 'e donosu.

Elena tenet una rosa in sinu,
perdinde est sa foza, est sàmbene sou,
lassat arrastos, caminu caminu,
de amore e de morte un àteru prou.

Macomer, 02 06 2023