Risposta alla poesia del caro amico Concas

Undighina non ses sola
di Renzo Rosa

Zuseppe ti cherìa
Domandar’una cosa
E penso chi risposta m’as a dare
Sa vera poesia
Siet in rima o prosa
Est cudda ch’ischit s’animu esaltare
Cun peraulas de coro
Chi alen prus de s’oro
E chi non b’at dinari a las pagare
Cun rima ‘e bonu gustu
E s’undighina ti dat tottu custu

Fut sa poesia gentile
Cudda fatta dae mastru
Siet in palcu o siet in cantina
Fatta in perfettu istile
cun versos a incastru
pariat de origine divina
ma como addiritura
timinde sa figura
l’an ammuntada de nafatalina
sos modernos poetas
chi ischin fagher solu battoretas

deo a bortas provo
mancari sena iscola
un’undighina de la cumbinare
sos versos giro e movo
comente in d’un alzola
sas frases mi ponzo a bentulare
cun calma bi pelèo
su ch’est in prus nde lèo
tentande sas rimas de assetiare
las limo e las adatto
e so cuntentu cando bi la fatto

ma no m’intendo rè
non tenzo cussas miras
anzis domando una mau ‘e azzudu
da ‘e Chessa de Torpè
da ‘e s’Iscanesu Piras
e tue puru Giusè non bistes mudu
torramos che poetas
a sa poesias perfettas
damos a s’undighina su saludu
ca est dirittu sou
de la mentuare torra da ‘e nou

9 ottobre 2008