Unu disisperu amorosu
di Paulicu Mossa

1.
Cun rejone infelize eo mi giamo
Ca, incostante e barbara, ti addoro!
De duos fagher dimis unu coro
Si m'ameras, ingrata, cantu t'amo!

2.
Formare dimis un'anim'ebbia
Finzas a esser in sa sepoltura;
Ca viver senza te m'est pena dura,
M'est vida de piantu e agonia;
Fingo, a boltas, trasportos de allegria,
Ma su coro est pienu de tristura;
Pro chi lontanu a sa tua hermosura,
In sos mezzus ispassos m'addoloro.
De duos fagher dimis unu coro.

3.
M'addoloro, e m'attis a sa morte
Cando mi negas tue unu carignu;
Pro chi sempre a t'amare a tott'impignu,
Che montagna de marmaru so forte;
Ma tue, pro sa mia mala sorte,
In d'una cambiadu has de dissignu;
Odiu mi declaras, e disdignu,
In cadenas mi tenes cale moro.
De duos fagher dimis unu coro.

4.
Che isciau mi tenes in cadenas,
De affannos sempre angustiadu;
Narami, bella, in dite hapo mancadu,
Pro poder meritare tanta pena?
Forsi tue non ses cudda sirena
Chi m'hat in milli modos incantadu,
Pro poder meritare tanta pena?
Forsi non t’hapo sempre idolatradu
E tentu in grande preziu e decoro?
De duos fagher dimis unu coro.

5.
In preziu fis tenta e preferida
Subra tottu sos idolos mundanos;
Ca da-e meda postu t'hap'in manos
Sas giaes de sa morte e de sa vida.
S'occurret calchi die chi non bida
Sa faccia tua, sos modos galanos,
De sos dolores piùs disumanos
Fina a fundu su calighe assaboro!
De duos fagher dimis unu coro.

6.
Assaboro sa morte, si ti paras
Incrudelida e a s'odiu presta;
Ca senza te sa lughe m'est funesta,
Nè curo sas deliscias piùs caras…
Ma si tue pro pagu mi declaras
De amore fiamma manifesta,
Tronet su Chelu, muat sa tempesta,
Deo non timo su furore insoro.
De duos fagher dimis unu coro.

7.
Da-e ogni consorziu divisu,
Ponemi in sas più aspras montagnas,
E si tue, donosa, mi accumpagnas,
Pro me diventana unu paradisu;
Ca consolas cun d'unu tou risu
De-i custu afflittu coro, sas intragnas,
E bestis sas isteriles campagnas,
A fiores de miniu e de oro.
De duos fagher dimis unu coro.

8.
Bestis de lughe cantu tue miras,
Ca ses sole perfettu de bellesa;
Pro cussu cust'anima ista suspesa,
Cando sos oios tuos in me giras;
Ne' nd'istudant pro me impetos e iras
Sa fiamma ch'in coro giuto azzesa;
Anzi cand'usas piùs fieresas,
Piùs de te m'incanto e m'innamoro.
De duos fagher dimis unu coro.

9.
M'innamoras piùs, ca ses incantu
De me, chi dia morrer pro ti amare.
Ell'edducas, ite nd'has de m’odiare
Ischinde chi t’addoro e t'amo tantu?
E proite in suspiros e piantu
Sa vida mi costringhes a passare?
Mira chi mi des bider sepultare,
Si mi negas s'affettu chi t'imploro!
De duos fagher dimis unu coro.

10.
Finis, pensa chi pro amare a tie
Sa mente mia sempr'est in regiros,
E chi fin'a sos ultimos respiros,
Hap'a istare amendedi goie;
E pensa chi pentida calchi die,
De haer fattu a mie tantos tiros,
Dês narrer lastimosa e cun suspiros:
Ahi, ch'apo perdidu unu tesoro!

De duos fagher dimis unu coro
Si m’ameras, ingrata, cantu t’amo!
Cun rejone infelize eo mi giamo...