Unu manzanu ‘e istiu

Che so pigande a pe a’ cussu monte,
ube naran ch’an bidu una pisedda
a pilos longos, bella che’ su sole.
Apo pensadu a cando, in cussa sedda,
currinde t’apo ‘ida in s’orizonte.
In su passadu paret chi che ‘ole.

Fit una die pàsida, serena,
unu manzan’ ‘e istiu. A su lugore
de’ cussu sole caldu s’abberian
fïores, ammustrande onzi colore
a sa natura, de sos nuscos prena
chi su padru drommidu ischidaian.

E cando cussos ojos as mustradu,
de s’ermosura insoro sos ispantos
custa terra e su chelu s’an godidu.
Sos fïores prùs bellos, tottucantos,
an su càlighe insoro pinnigadu,
ca bellesa prùs manna aian bidu.

Su coro meu tottu s’est abbertu
e luego mi l’as tue impreadu,
prenàndelu de tébios sentidos.
Su primu amore aias semenadu
in custu pettus nudu che desertu,
prenu solu ‘e disizos ismarridos.

Ma cando cussa pranta est fïorida,
su tempus non l’at tentu ‘e t’ammustrare
cussos colores ch’aias pintadu.
Su fadu ti ch’at chérfidu leare
attesu, e tue ses isvanessìda,
appustis chi su coro m’as mudadu.

In custa sedda como so torradu
e miro apinnicadu s’orizonte,
chircand’ ‘e assebertare su lugore
de’ cussos ojos tuos. Ma su monte
si ch’at ingultu tottu in su passadu,
de cando at bidu nascher cuss’amore.

E mi che torro insegus,
ca de ti bider torra sa chimera
s’est isfatta in s’aèra,
e bolada si ch’est paris cun tegus.