”Tentativi di poesia sarda”

Aiapo pessadu ‘e facher festa
Chi sos de innedda amicos paesanos
Ma calicunu chene sale in testa
Isconzu n’hat istios e beranos

Tantos amicos b’hapo emigrados
Chi han lassadu sa terra iscioro
Ma in custa occasione son ghirados
Ca po iscios sa bidda es che tesoro

E como chi sa zente a cuba cuba
Apompiat briguras e retratos
A mala boza s’istat a sa muda
Paret chi non b’hat prus canes e gattos!

Sa bidda hat imparadu chi sa vida
Est fatta poi isperder donzi bene
E po s’imbija juchet calamida
Mancari siat in artu es chene rene

Nois carchi borta hamus sa pretesa
finas de custu munnu a cambiare
inghiria ca t’inghirio b’es sa resa
pesanne chi es menzus a lassare

Imbio a Continente, a sos pastores
Po torrare a cantare in notte ‘e ghia
A su paese ghiren sos minores
Po animare carreras e via(s)

Jeo no n’isco si b’apo a torrare
Ca mi ne dolet su coro e sa mente
Mi paret de torrare a cuminzare
E a sa fine a facher niente

Peruna cosa e nessun’ofesa
Iscrio ca dae s’anima est escida
E no mi vanto de tanta bonesa
Mancari parjat chi acco s’ischida

M’azes a iscusare paesanos
Tantu bisonzu apo de isfogu
E iscrio versos male inghiriados
Ma po custu bos pedo su perdonu

Però cherjo imparare sa poesia
E cantare sas cosa pius bellas
Po chi non b’abat pejus zelosia
Torren poetas de bonas novellas

Po s’isperanzia chi no morjat gai
M’apello a cussos zovanos balentes
De bidda mea no intennapo mai
Sa leze antica de “ocros e dentes”

“Incantos de Orune” Coro ‘e zelu
Rimas hat fattu in crejas chi su cantu
Armonias de amore arzen a chelu
Po chi sa bidda siat unu vantu

Chin notas de tenore, anticu cantu
Bidda mea non torres sutta terra
Torra a sonare campanas de vantu
Tòcalas po sa pache e no sa gherra