Torrademi su soddu,
chi mi che azis leadu,
isco deo comente l'impitare;
che catzo su loroddu,
a carchi isantaladu,
chi cussu soddu at cherfidu a li dare,
e male l'at usadu,
ca su luttu at giamadu,
intro 'e su sinu 'e mamas e mudare,
sa bellesa 'e sa vida,
e cun s'iscuru eternu l'at unida.

Nacchi l'at impreadu,
po difender s'amore,
però cussu ch'est fattu in libertade;
non contat s'as amadu,
dadu chena calore,
fattu 'e faulas, chena veridade.
Tue chi fis cun megus,
issa chi fit cun tegus,
fimis in medas che comunidade.
Unu consizu ebbia,
d'istare attentos a sa maladia.

Ma s'amore est sentidu,
disizu, affettu e brama,
ch'essit, che funtana, dae su coro;
su soddu at abbrutidu,
non contat de sa mama
su fizu ch'est naschìdu, prenda 'e oro.
Cun affettu ses dada,
ca s'est intesa amada,
rispettada e servida cun decoro,
e tanta dignidade,
ch'est fiza e mama de sa nobiltade.......

....e d'animos lieros,
chi chircan veridade,
s'amore, su rispettu, su recreu,
e sentidos sintzeros,
s'affettu e s' umiltade,
sa paghe intro 'e su coro, chen'anneu.

Segnalazione XXXII edizione " Premio Logudoro" - Ozieri 2013 -
Sezione "Musserradu Meridda" - Poesia in rima a tema imposto: "Dignidade fiza e mama....."