Vela de nue. In s'Alighera, su 26 'e lámpadas 2004

di Benito Saba (2004)

Vela de nue carignada
dae sa frina 'e su sero,
bianca lébia rosada,
solenne in s'occasu,
solástiga
in s'aera asula ammajada...
Attesu, a bosanu,
una sinza indeorada
che isteddu coudu
a lenu a lenu est falende
in s'orizonte...
biazantes a un'áteru chelu
cara a una die pius longa...
Ultres sas undas biaittas
su mare est lugore de prata,
su sole s'est solovrende
in su lagu níbidu 'e oro.
S'istella 'e su 'ésperu, improvvisa,
in s'intrinada atzinnat curiosa
e isettat sas sorres minores
mirende unigosa...
Galu pitzinna sa notte
a oriente a s'accua dae su monte
s'accherat bajana cirusa,
maniosa 'e sa doda ammustrende
su primu velu intramadu 'e saffíru...
Non mi trampas!
Mantas nieddas remunidu
as po sa biza addajada...
cando túncias de un'áteru iscuru...
Milla!... Báscia, sa luna, attelada,
ammasuleri iscanzat muitzona,
abbelada... Non ti ch'andes, piga!
Istanotte, dengosa, mi ses cara.

Benito Saba

Questa poesia ha conseguito la MENZIONE D'ONORE al XXIII PREMIU DE LITTERADURA SARDA "ROMANGIA" - SORSO-SENNORI - 2004