Vera Poesia
di Celestino Caddeo

Balet a nudda sa sola natura
Pro resultare veru cantadore:
Issa si cheret unta de tristura,
De lagrimas, de penas e dolore,

De fastizu sobradu e de rancore,
De calchi maladia troppu dura,
De unu bisonzosu pallidore,
De solidade fora de mesura.

Tottu sos raros cignos esistidos:
Gregos, Italianos e Latinos,
Ateros puru nde dana s'esempiu:

Ma sunu cantadores de iscempiu,
Senza concettu, tottu miserinos
Sos de degni fortuna favoridos.