Vergine mama
di Antonio Farina

Vergine mama de chelu rejna
su peccadore a brazzos tuos giama
pro s’emendare in sos peccados suos
e benner perdonadu totalmente;
e pro s’amore de su Deus onnipotente
assistas tue sa razza adamina.

Sias cunfortu a sa zente mischina,
su bene disizadu a tottu dias,
faghe custu meraculu evidente;
sias cunfortu a sa meschina zente,
su bene disizadu a tottu dias;
cunfortu a sa mischina zente sias,
odios, malumores eresias
dae s’umanidade tottu iscazza.

Vergine mama de chelu rejna
su peccadore a brazzos tuos giama;
rejna Vergine e de chelu mama
giama su peccadore a brazzos tuos;
pro s’emendare in sos peccados suos
e benner totalmente perdonados;
pro s’emendare in sos suos peccados
e benner perdonados totalmente;
e pro s’amore de su Deus onnipotente
assistas tue s’adamina razza.

Su peccadore a sinu t’abbrazza,
cuddu chi deviadu at su caminu
de su chi nos at Cristos insinzadu;
cuddu chi su caminu at deviadu
su peccadore t’abbrazza a su sinu;
cuddu chi deviadu at su caminu
de su chi insinzadu nos at Cristos;
sias su sullievu de sos tristos
da nos sas nezessarias provvistas.

Vergine mama de chelu rejna
su peccadore a brazzos tuos giama;
rejna Vergine e de chelu mama
giama su peccadore a brazzos tuos;
pro s’emendare in sos peccados suos
e benner totalmente perdonados;
pro s’emendare in sos suos peccados
e benner perdonados totalmente;
e pro s’amore de su Deus onnipotente
sa razza adamina tue assistas.

A pastores, massajos e artistas
e a negoziantes e segnores,
a bascia plebe e a sos benestantes;
e a segnores e a negoziantes,
a massajos, artistas e pastores;
e a negoziantes e a segnores
estirpa dae su mundu sos errores,
ispari de ingiustizia dogni nue.

Vergine mama de chelu rejna
su peccadore a brazzos tuos giama;
rejna Vergine e de chelu mama
giama su peccadore a brazzos tuos;
pro s’emendare in sos peccados suos
e benner totalmente perdonados;
pro s’emendare in sos suos peccados
e benner perdonados totalmente;
e pro s’amore de su Deus onnipotente
sa razza adamina assistas tue.

Dogni rancore e odiu distrue,
tzedi a tottu sa manu de amore ;
e infinitas grazias a tottu tzedi
e distrue dogni odiu e rancore;
faghe chi dogni umanu abitadore
potat passare felice sa vida;
servinos de cunfortu e de guida
po poder su peccadu allontanare
e poi eternamente pro gosare
cun tegus dogni grassia devina.

Vergine mama de chelu rejna.