In sas dies proghinosas atonzinas
passaimus sas oras in pinnettu;
fin oras de tristesa e de isettu
de sas oras lughentes manzaninas.

Babbu iscriviat ottadas e tertzinas,
pro me fit in su lezer su dilettu
pro m’affinare bene s’intellettu
e ponner poderosas raighinas.

Babbu carchi tertzina mi leziat
e sa oghe in cuss’ora ‘e tristura
mi pariat accurtzu e lontana.

Cando fit notte, sutta sa gabbana
babbu torrabat una criadura
e cantende e narzende si durmiat…