T’apo ‘idu pranghende, a manos giuntas,
a pupìas cumpuntas,
in sa vida.
Times sa dispedida
chi t’isettat? O ite mi preguntas?
…
“Pro cale disingannu so inoghe”,
naras cun trista ‘oghe
sorre mia;
“so a sa finitia:
su flumen bell’est giòmpidu a sa foghe.
…
Sogniài s’amore in gioventude,
unu cras de salude,
de recreu,
cun cudd’isposu meu,
su chi non l’at salvadu sa virtude.
…
Lestra che a su gosu ch’est colada
sa die indeorada
cun su sole,
como chi mi console
no apo ispera in sa notte inchelada.
…
Pro custos duos lizos, cale luna
si ‘estit tott’in d’una
de rezelu?
Jàju mannu ‘e su chelu:
abbèri a issos giannas de fortuna!
…
Pro ite sun crabolas innotzentes,
astros bivos lughentes
sen’amparu,
no an perunu imbaru,
esemplu ‘e bonidades affruentes.
...
Eppuru, poverittas criaduras,
in mesu a disauras
de dolore,
inarboran s’amore
cundìdu ‘e nobilesa e de ternuras.
…
Sunt eligheddos birdes, fora male,
e non timent s’istrale
de sa morte,
pro chi sa mala sorte
nd’apat dannadu sos ratos noales”.

Primu Premiu in su cuncursu Premio di Poesia Sarda "Tiu Finu" de Romana - 2016