Vintitres de Trìulas 2009
de Maurizio Faedda

pro no immentigare

Ispàsimos in campos e costeras,
giutos da-i su ‘entu a curridorzas,
inue tìana sas messadorzas
acutas intriscare sas messeras,
limbas de fogu accaddan sas aeras
ca tue has allummadu sas cussorzas.

Chie t’hat postu in manu s’allumminu
chi hat atzesu vile s’istinchidda?
Giompet fintza a sos oros de sa ‘idda,
su fogu dende istragu a su terrinu,
brujat sa lana a masone arveghinu
e li giagat in bucca sa mamidda.

S’idet chi a coro giughes unu crastu,
in cabu pensamentos chena seru,
ca ses dannarzu e t’intendes fieru,
a sas fiamas hasa dadu in pastu
montes e baddes a fagher sagrastu
e semenare morte e disisperu.

E bessis trancuillu a cara alta,
no has caldu ne frittu in su sentidu
a daghi ‘ides su logu affiggidu,
ca troppu manna l’has fatta sa falta…
e nara cando a s’àlvure gualta
be-i torrat puzone a fagher nidu?

Sas costas nudas mustran sas rainas,
sas pedras nettas che in sas pedrajas,
da-i sos littos falados a brajas
bolan in perdisciones sas chijinas,
s’ispantu pibiosu ‘e sas ruinas
si perdet in muntones de ghiajas.

Deris, sos frades in Tempiu has mortu,
oe in Mores e Puttumajore,
est sempre ‘iu e friet su dolore;
ca suni ruttos chena fagher tortu
e tue curres a runchile isortu
brujende in sa natura ogni fiore.

Hapas impudu de fogos e luas,
peri sas tancas sos dolos carigna,
franghe e revuada s’intragna maligna,
bruttas vilesas ch’asa fattu e cuas
ch’anneu fàghene a sas terras tuas
e dólimas in coro ‘e sa Sardigna.

2° premio - Villanova Monteleone 2012 - 21^ edizione Premio di Poesia Sarda “Remundu Piras”