In su chel'isteddau mancat solu
bandulera sa luna a bolu istesu
issa chi totu lischit l'at cumpresu
ch'intro e cherveddu mi vuddin disinnos
d'idere isteddos faghendemi azinnos
e deo in mesu issero andande a bolu.

E che in bisu su entu mi trazet
tessinde bolos d'oro, lepieddu
tentu a sa manu cun dun'anzeleddu
ider de palas su sole pasande
e in s'iscuru istinchiddas ballande
sa terra istraca, che nue viazet.

In camineras de bida a mi jugher
a legher coros de rosa e nieddos
nandemi tottus diventana isteddos
sos ch'in sa terra ant pastinadu amore
fizu de s'onestade, in su dolore
isperas artas e noas allugher.

E volande, volande in s'infinidu
issu cun megus, tentoso a sa manu
cando mi mustrat s'Arzola 'e Zerdanu
sun sos massajos a manizu antigu
dae sa paza seperande trigu
pro su poveriteddu ch'est famidu.

Bragande cun s'isteddu 'e Chenadorzu
sos Sette Frades cantandesi in coro
che cando in sa butega 'e s'arte issoro
tessinde pinzos de preju e valore
cun sos Vacheddos e Su Truvadore
de s'universu su ver'ascusorju.

S'isteddu de S'Avreschida, apparidu
tancat sa janna a sa notte, aperinde
un'atera a su sole ch'est naschinde
pro nd'ischidare sa zente assonnada
e deo conte su gosu chi dada
ider su chi non bio essende ischidu.

S'incantu 'e su criadu, una pro una
de sinu sas cussorjas solianas
sos bellos visos chi nos dant mattanas
camineras de sole, isteddos, luna.

3° Premio ex aequo Poesia in Rima Premio Biennale di Poesia Sarda "Giorgio Pinna" Pozzomaggiore