Zente pagu sintzera
di Pinuccio Giudice Marras

Zente pagu sintzera m’at ispintu
a bider carchi neu in s’amistade
e un’istante, che fadalidade,
chin tintas d’amargura umbras m’at pintu.

Chena esser malignu pro istintu
e ne dudosu ’e s’anzena bontade
penso ch’a bortas fintzas frade e frade
perdan su filu ’e cudd’amore istrintu.

Ue su tempus coros incrueschet
in climas fritos chi non dan respiru
morit s’aficu ’e apghe chi non creschet.

Medas bisamus amigos d’ammiru
ma dae sempre inue die avreschet
zente pagu sintzera amus in ziru.