(Poesia cantada da “Su Cuncordu Iscanesu” pro ammentu, a dolu mannu, de su ciclone “Cleopatra”)

Generosa in sa traschia,
galiarda e fiera
zente sarda, zente vera,
fortza paris, zente mia!

Sa Sardigna at post’in lutu
Cleopatra sa dannalza,
cussa perfida majalza
coro e samben at distrutu,
chie in mesu no’ ch’est rutu
at s’ispera semper bia.

Rit. Zente sarda, zente vera,
fortza paris, zente mia!

Zoventude, fortza paris
pro sa zente bisonzosa,
semper pronta in dogni cosa
dae Tatari a Kalaris,
sena pagas ne dinaris
est sa mezus “balentia”.

Rit.

In sas oras de apretu
prontos a dare s’azudu
sos “anghèlos de su ludu”
mustrant oe totu s’afetu,
fizos bonos chi rispetu
meritant e simpatia.

Rit.

Zente ch’at su coro forte
che nuraghe e che granitu,
chi ne abbas e ne fritu
l’assuconat, mancu morte,
finas in sa malasorte
binchet dogni marturia.

Rit.

E su sardu si nd’ischidat
da sos sonnos prus metzanos,
cun su coro e cun sas manos
lenu lenu si nd’achidat
e sa temporada isfidat
pro torrare in allegria.

Rit.

24-11-2013