Artas, a chelu, pesan sas farrancas,
sas zimineras, in tristos ammantos.
De sa richesa non sun prus foreras,
ma distimonzas de sos disincantos.

Depian esser che faros in mare,
d'ìsperu 'e tughe noas batidoras;
a ora 'ezzas, sighin a pompiare:
revuzos malos, ispartos in foras,

sas erbas sicas, su logu ispozadu,
sos puzones chi 'olan chena briu.
Fìnzas su cantu pèrdidu at su riu,
chena vigore curret alluadu!

Fatu an desertu, a colore 'e prumu,
simile a campu, passàda sa gherra:
sos sonnios nostros,frundidos in terra,
sas isperansias isortas in fumu.

A lavras e a bucas iscantzadas
chi pedin pane e friscu selenu,
pruere fine feridi e velenu,
ca sas promissas si che sun bofadas!

Cambiadu nos ana vida e sorte,
non b'a triballu, m' an carradu morte!

Segnalazione di Merito al Concorso di Poesia Sarda "Sa Quartina" - Meana Sardo 2015