A lenu a lenu est decrinanne
sa conca su sole a s’iscuricada
ispricannesi in s’abba
sos pilos d’oro.

Tzoppica tzoppica,incurvadu
chin sos pilos inchisinados
bao in sa carrera ‘e su tempus
serente a sa ralla ‘e sa bida,
che runzìnu istasidu.

Sos sàliches, murmuttan
trème trème
mimulas tristes
a sas frinas d’atonzu.

A palas su ressole, est
arrancanne su terrinu, chin
raichinas rujas tostorrudas.

A cara cara, sest’apèrinne
s’angustia de su sero
acchirranne isporosu
iscuru che trumentu.

Ma jeo bao istraccu, chin
sos pilos biancos, tirannemi
assecus sa zoventude, chi
decrinanne sa conca,
che calabrina umbrosa
prus non mi chèret sichire.

3°premio sezione poesia senza rima a tema imposto: (E colat su tempus/E calat a istiddiu a istiddiu /A prener s’erribu e sas eras.) -- “sa Madonna ‘e su nibe” comune di Teti 2014