Perdu teniat una dexina de giualis
de binja, in Genna ‘e Tunzu, unu logu pagu cultivau e meda
imboschiu. Logu de sirbonis e de pillonis.
Casi dogni annu is pillonis ndiddi binnannanta sa binja prima de
coiri s’axina.
Perdu, arrosciu de treballari po debadas po curpa de is pillonis,
s’est rivolgiu a unu connau e a su Retori de sa bidda po ddi
donai una manu de agiudu po cumbatiri is pillonis.
Su connau e s’Arretori chi fianta duus birbantis dd’hanti
nau: “Ci pensaus nosus bastit chi tui nos si fazas unu bellu
prangiu cun peza de porceddu, casu marzu, e binu nieddu.”
Nau e fatu. Sigomenti sa dì innantis ci fiat sa festa manna
de sa bidda, s’Arretori e ita hat fatu?
Nd’hat pigau totu is fetas chi su comitau haiat apicau in
is fentanas de sa Cresia e in su campanili (tantis sa festa fiat
acabada e is fetas no serbianta prus), e di acordiu cun su connau
hanti decidiu de ddas apicari in sa binja de Perdu po nci podiri
bogai is pillonis.
S’Arretori hat portau puru bestimentas chi sa genti dd’haiat
donau po is poberus de sa parrochia (ma chi nesciunus prus boliat)
e cun cussus hanti fatu unus cantus stramaionis chi hanti postus
in mesu de is giualis de sa binja. Pois hanti ligau tot’is
fetas chi s’Arretori haiat portau e si funti sezius po amirai
su traballu chi haianta fatu.
“Innoi no c’hat a passai mai prus pilloni! –hat
nau s’Arretori castiendu sa binja, totu acapiada a frocus
coloraus– Una binja in festa, no c’est fundu sena de
frocu.”
E su connau de Perdu dd’hat rispustu: “Hant a nai is
pillonis, ocannu po sa binnenna s’hanti preparau festa manna!”
Comenti fiant godendusì su bellu traballu chi haiant fatu
ecu una piga chi arribat e si calat comenti de unu aeroplanu propriu
in conca de su primu stramaioni chi hanti postu.
“Afairu malu heus fatu. Mi parit chi innoi ci bolint is brebus!”
Hat nau s’Arretori, bidendu sa piga in conca a su stramaioni.
“Nossi, s’est giai fuida po s’azichidu!”
Hat nau su connau de Perdu. Ma no hait finiu su fueddu chi nd’arribat
una bolu de pigas cantendu e allirgas, pariant andendu a sa festa
de Sant’Arega.
“Crò, crò, crò.” E ognuna bandat
a si collocai in conca de unu de cussus stramaionis chi haiant cuncordau.
“Mi parit chi innoi is brebus no bastant prus. –hat
nau s’Arretori preocupau– Deu ddis tocu de liberu.”
E infatis ecu arribari un’ateru bolu de carrogas cantendu
allirgas che Pasca aboxinendu e nandu: “Ma totu innoi est
sa binja? Custa dda binnennaus in mesora!”
Pois subitu aterus bolus de cruculeus, de cardaneras, ghirus, meurras,
canarius, turdus, sturrus, in pagu tempus sa binja pariat unu aeroportu.
Si bidiat aterragius continus de dogna parti.
Ci fiat unu burdellu de cantus de pillonis chi pigat a conca: “Ciu,
ciu; crà, cra; grò, grò; crò, crò.”
“Ma comenti mai anziché timiri custus pillonis si sunti
riunius totus innoi pois chi heus postu is fetas e is stramaionis?”
Hat nau su connau a s’Arretori chi isciat puru chi fiat unu
bravu etologu e ddi hat domandau: “E ita sunti nendu cun su
cantu insoru custus pillonis?”
“Seu spantau deu e totu a ddus intendiri. Sunti in festa.
E sunti tzerriendu is amigus insoru po benniri a sa festa de sa
binnenna. Biis hanti tzerriau su marragau poita ci sunti medas abis.
Ddus intendis su chi funti nendu? «Benei , benei a sa festa
de sa binnenna de sa binja de Perdu. Benei, c’est festa manna
labai is fetas chi hanti postu in sa binja. No timais a su stramaioni,
est totu una finta po no si fairi a timiri. Tocai piciocus a binnannai.
Mi racumandu, prima su muscadeddu, e s’axina bianca, pois
su bovali, s’olopu, s’axina orrosa, sa vernacia.»”
“Ma s’Arretori e ita m’est cogliunendu? Is pillonis
no fueddant.”
“No fueddanta che a nosus , ma tra issus sì, e su chi
issus nanta, deu ddu cumprendu, fillu miu.
Castia cussu zurrulliu chi est papendusì cussu gurdoni de
muscadeddu, a dognia pibioni chi ingurtit cantat. Est tzerriendu
is cumpangius sus a benniri a binnennai. Castia castia cussa mama
cun is perdixis fillas suas currendi parit una puddighina de mata.
Mì su cucumeu puru est arribau. Là, là, is
varzias, cussas sunti bennias po is abis sunti che i su marragau.
Castia, castia is sturrus a trubus sunti benendu. Mì, mì,
su verdarolu, su canariu, su cruculeu, sunti gherrendu cun d’una
cardanera po unu pibioni de muscadeddu. Castia cussu zurrulliu bicandu
sa feta colori di arrosa, dd’hat pigada po axina arrosa. Una
festa aici bella no dd’hemu ancora bia. Ne mai hemu biu un’aredi
de pillonis, aici varius. No hant’essi’ scambiau sa
binja de Perdu po s’arca de Noé? Sa cosa est comenzendu
a mi ponni’ pensamentu. Comenti hat fatu su mangoni a nd’arribai
a innoi?
S’achili, su untruxu, su stori, su poni, sa menga, sa puliga,
su cau, e is pillonis chi bessinti a de noti comenti mai sunti totus
innoi? Deu no creu de essiri santu Franciscu. Innoi ci hat postu
sa coa su tiaulu, comenti nanta in bidda mia! Mi tocat a ddis tocai
de liberu po salvai’ s’onori miu e de sa cresia, ma
dd’hapu scaresciu in sagrestia e sa cosa certu no si podit
improvisai.”
“S’Arretori miu, no c’est prus nudda de fairi!
Ddu bit chi sa binja non portat prus mancu folla?”
“Dep’hemus fai su binu po sa missa cun Perdu e abardenti
po cunfitai sa ceresia e su pirasteddu, ma mi parit chi no s’est
andau mali su detreminu… Passienzia, Deus nc’hat a penzari…
Issu cosa mali posta non di lassat mai… e nosus seus in is
manus de Deus.”
Dd’arrespundit su connau: “Mi dispraxit po Perdu chi
hat traballau sa binja cun sudori de sa fronti, ma issu puru chi
creit in Deus e ligit su Vangeliu hat a cumprendiri mellus su chi
Gesu Cristu hat nau:
«…Castiai is pillonis de s’aria, no traballanta,
no tenenti letu po dromiri, ne bestiri e puru bivinti su propriu
e no si preocupanta de nudda.»”
Imparai a biviri, ominis, imparai! Is pillonis puru funti fillus
de Deus, e Deus fillu afligiu no ndi lassat!
=================
Gabriele Ortu si è spento il 6 luglio 2008 - Questo
suo racconto serva per ricordarlo sia come artista, ma anche, come
uomo fraterno e leale.
