Nazzemi, itte non si diat fachere pro una femina? O galu pejus, itte una femina nos fachet fachere?
Non diat bastare unu fozzu prenu de paragulas pro lu narrer, unu libru bi diat cherrere, bellu, craru e prezisu.
Custu ca, cando unu, issu, che perdet sa conca non cumprendet prus nudda, una zicca, unu casticau dae sa manu ‘e Deus, una condissione de rincoglionimentu ube ch’imbolat finzas sa dignidade.

Est a los intender sos culumbos, cicicì, dadà, tando unu basicheddu, unu suspiru, du dudù. Goi si perden pro semper sos cumpanzos, deus bardet chi los chirchezas, non bi los azzes a connoschere prus, comente lis appan irbodiau sos cherbeddos, ponendecheli unu nobu, ma chin pezzi unu neurone e imbriacu puru. Bos paren libertos? dazze cara.
Pro los iscoperrere toccat chi los fachezzas faveddare. Bi cheret pacu. Comente los intendezzas nande macchighinadas irbarionande chi in dommo, pro narrer, bisonzet de si moghere bestinde sas “pattinas”, o si bincana de si che battire iffattu in sas bacanzias, sa socra, ma galu pejus, bos cussizen cando est’ora de pissiare chi lu facazzas settios. Tando, si bi credies, sinnaebos ca azzes perdiu un’amicu. Pro semper.
Ma Pascale no aiat custos anneos.

Bellu pizzinnu, artu e bene postu lis piachian sas feminas e a sas feminas piachiat, las prenabat de cussideru e de zentilesas, e issas nde fin cuntentas e cumpiachias, nessi finzas a sa die chi issu non connoschiat una pizzocca chi li mudabat su minimu de su coro, a l’intendere, cando la bidiat, unu podiat pessare chi esseret appiu carchi tocca Tocca fuste cubau in sas pettorras.

Innamorau, e no est chi a issa non bi li piachiat, fit chi su babbu e sa mama parian canes de guardia, cherian ischire tottu, isseperaban sas cumpannias, daban unu zudissiu pro cada cosa, est a narrer chi s’omine chi deppiat aer sa fizza deppiat essere comente lu cherian issos.

Pascale aiat pessau a tottu, a sos ocros de sos “socros” deppiat cumparrer comente unu omine de bona familia, educau, istudiau, istimau dae tottus, e, chi male non fachiat, finzas chin s’interessu.
S’iscotticu liu aiat dau unu seranu chi ammaniaban in “s’albergo” Esit, postu supra de su monte Ortobene, chi tando galu fit apertu. Che los cumbinchiat esseret istau unu de sos organizzadores, piccada una mesa a numene suo, muttiat a li facher cumpannia e de compares duos amicos, bravos pizzinnos, ma chene abba in brocca.

<<Bestiebos bene>> lis aiat nau, e issos fin bennios in jeans e zubbotto. Deppian surridere e bibere, saludare e bibere, faveddare e bibere li facher cumpannia…e bibere.
Imperiu chi lis fit resissiu benissimu, manicaban che lupos e bibian chi fit unu piachere. Abberu bravos, tantu chi issupra de sa mesa non codiaban manc’ascra, né de s’issoro e né de su ‘e Pascale, professionistas, e issu s’azzappabat alluttu dae su sidiu e a gana netta, Deus bardet esseret azzocchiau a sa mesa, non lassaban mancu sas frichinias, nudda.

Tottu bene, nessi gai pariat, finzas a cando non beniat s’ora prus isettada de sa festa, Pascale, deppiat cumbidare sa pizzinna a ballare, chin su babbu e sa mama indainnantis. Su mamentu prus importante, s’ora de sa beridade, in cuche si fit’istada bida tottu sa balentia, e si s’omine fit de gabbale.
Issu, solu, chin issa a ballare unu Rock’n’Roll.

Custu, mentras sos amicos suos si che fin fattos tundos che bozza, a forza de isticchire manicu, sa brente che porcheddos e, non fin prus mancu sinzeros, prus apprestu fit meda si galu ischian in cala mundu fini.

Peroe, currettos e educaos saludaban sa zente, tottus, nessi deche, bindichi, trinta bortas chind’unu surrisone “ebete”, e fachende de poddiche, mustrandelu in pista, naban,<<siamo amici di Pasquale eheheheheh…>>.

Cominzabat su ballu, unu pede a dresta, unu a manca, iscarchidada a un’ala, una a s’attera, ancas a ruche, unu brinchiu, duos, tres. Tando unu chircu, mudande su passu, issa chi tirat issu, issu chi tirat issa, tentos a sas manos a largu, comente unu lasticu, e abbrazzaos, chin sa zente cuntenta chi iscudiat sa manos, sa musica chi ispinghiat s’adrenalina”e dae chi ti do, Pascale s’intendiat unu deus, cominzande, comente si nata a “cacare iffora”:
Goi, tra una zinettada e s’attera, molinadas, ziradas, inghiriottadas, issa pariat una furriajola. La pesabat a bolare e tando la teniat chi mancu Dino Zoff, tantu chi issa bortabat dae su surrisu a su terrore, ca non resessiat prus a ponner sos pedes in terra.
Intante cuddos, Caralu e Paolo chi fin semper cue a saludare e bibere, surridere e bibere, secaban in curzu colande a “su bibere e bibere”, cherimus ponner? meda prus lestru, pezzi b’aiat unu problema, cumprendere su chi naban:
<<ssscciiaaoo…gnoi scemus mmmiici gnii pascuaaee>>.
Ma su ballu fit fininde, e sa femina aiat za pediu su permissu de atterraggiu a sa turre de controllu, S’atteru c’aiat perdiu sa conca e non bi lu firmabat prus nemmos.

La poniat a bolare prus in artu chi podiat, una, duas tres bortas, sa cumpanza cuntenta cando fit in aghera fachende una frigura ‘e su ballu, li imbiabat unu sinzale de amore, astringhende sos punzos bocabat sos poddiches mannos dae mesu ‘e sos atteros, nande una paragula chi fit piachia sos socros <<<LÈ….chi ti sicches!!>>>
Comente in sos focos de artifiziu, pacu prima de serrare su ballu, l’iscudiat in artu, e s’ischit, cale si siat cosa siat anziada a chelu, c’at a falare, gai e tottu issa lu fachiat che coette.
Pascale che l’aiat tenta duas bortas, galu una e su ballu fit finiu. Billa, falande affilada a issu, <<billa….commo la tenzo, mi mi, apperio sos brazz….>>
Si fit intesu pezzi unu sonu PATACCCIACCCKKK. Non fit una batteria ma sas nadigas de sa pizzinna chi s’incollaban a sa pista.
In prantu non cheriat mancu pesare pro sa birgonza, non bi l’aiat tenta, comente su “fidanzamentu”, perdiu.
Pascale si fit fughiu, Paolo e Caralu, nanchi los aian bidos in sa solidae, chind’unu surrisu ebete, cottos che pippa saludaban tottus nande <<ssscciaao …gnoi gnamo mmici gni Pascccuuaaeeee>>