Tra "Sas Grassias" nobas e-i s’ispuntone’e "Cortessusu", sichinde su pettorru quasi a canacosta de via Ferracciu – unu tempus via Longa – bi rucrat unu caminu chi curret lestru da-e "Pratta ’e Santu Jubanne" a sas domos de Faustu Are. Cussu caminu est via Roma. Nois nugoresos però li namus "S’Istrada", ca paret chi prima ’e facher sa presone chi ch’han ghettau, ube s’assoliaban domittas, cortes e carchi bella pratta, bi seret hapiu un’istrada, longa, larga e bene allisiada, badiada da una paja ’e chercos semper disizosos de accuntentare sa povera zente chi andabat in chirca ’e azicu ’e consolu. De istradas, sas giannas e-i sos portales de sa domos de Nugoro non nde fin in desizu, ca bi fin in totube. Ma si biet chi sa chi bi fit in via Roma depiat esser distinta, si est beru chi hat dau su lumen a tottu su bichinau. Depiat esser importante non solu pro sa mannaria, sa fattura e-i sa calidade ’e sa preda, ma peri pro su fattu chi l’hapan posta in d’unu trettu comodu a totu sa zente ch’istabat in cussu bichinau. In pacas paragulas, depiat esser un’istrada caentosa in iberru e frisca in istiu.
Su fattu istat chi cussu bichinau da-e tempos anticorios si nat "S’Istrada". E como sos bezzos la muttin galu gai, a dispettu de su bellu lumen importante chi sa zente ischia l’hat postu cando l’hat battizada chin totus sas regolas de leze.
Si mi lu permitties, como bos conto carchi cosa ’e cussu bichinau, ube mi so’ fattu mannu e ancudu. Haio battor annos cando da-e su nidu ’e "Santu Predu", ube so’ naschiu, nche so’ falau a sos zassos caentosos de "S’Aligurru",via Roma.
Tando, però, medas cosas fin diversas. Diversa fit sa zente, diversos sos caminos, sos modos de pessare. Tando Nugoro fit galu una biddichedda de pacas animas. E crediat in Deus. E comente puru! Como, manu manu chi zirat sa rosa ’e su tempus, chin su fusu untau ’e malissia, pistat che zizios totu su chi acatat in caminu, e chin sa frunza ’e benenu irfoettat sos sentimentos prus caros de sa bida. Progressu non semper cheret narrer zivilidade.
Fipo nande, nche so’ falau a sos zassos caentosos de "S’Aligurru".
Su tempus de sa pizzinnia est tempus de bolos. De bolos d’abile. Sas nues de su chelu pican sa forma chi cheren sas creaturas. Cannas, ferulas, iscraresias sun sas ricchillias, sun sas perelas chi sa campagna regalat a sos massajos e a sos pastores, a totu sos campagnolos, pro chi sos fizos incominzen a fravicare sonnios. Sonnios d’oro. E gai, iscurtu, chin sa candeledda ’e su muccu semper allutta, hapo imparau a currer su cabaddu ’e canna, da-e su contone ’e presone a "Sa ’e Jubanne Mele", o a sa "Pratta ’e Santu Jubanne".
Chie non ammentat chin affettu sos tempos de sa pizzinnia? Pro chi malos sian, sun tempus bellos ca juchen su sapore galanu ’e s’innossensia, e-i su profumu delicau ’e s’amore.
Piero, Ughetto, Gonariu, Bustianu, Franzischinu, Chicchinu e tantos ateros, fin sos meres de s’universu. Pro issos fit semper beranu. Bi fit semper su sole. Bàndidu, bellu, tottu issoro. Manu manu chi creschian , creschian sos sonnios. E creschiat s’amore pro sas cosas onestas, pro sas cosas galanas. Mi paret de bier galu a ziu Predu Lana, incue, in su contone ’e presone, a zarra chin ziu Zuanchinu Veracchi, chin ziu Milianu Zua e chin ziu Uria , faveddande de carros, de jubos, de cabaddos, de cunzaos, de annadas bonas e de incunzas de gana. Fit unu piachere a los intendere. Zertu! Est beru chi fin quasi totus analfabetas, ma ischian su chi naban. In s’arte insoro fin professores de universidade. Haian frequentau da-e creaturas sas iscolas de su traballu , de sas peleas, de su sudore, in sas forestas, in sas cussorjas, in sas percas ube s’arau colabat solu pro miraculu divinu. E ca su massaju cheriat chi seret colau, chin cuddos bellos jubittos, ubbidientes a sa boche ’e su mere. Sas dies notas a su contone ’e "S’Istrada" addopaban peri ziu Biasu Moro e ziu Bachiseddu Pintus. Babbu, ziu Franziscu Zerdanu e-i su frade, ziu Lenardu Ocreddu, non bi mancaban mai. Ziu Lenardu si sediat in sas iscalineddas de ziu Roffaelle Melone, a cantare a murmuttu poesias improvvisadas.
"Da-e corpus!", li naban sos amicos. E issu intantu sichiat a cantare a sa sola, fachendesi sas dimandas e dandesi sas rispostas. "Bene fattu!", li jubilabat calicunu. Ma issu, tranchillu, in brazzos de sa musa, sichiat comente chi su mundu seret istau totu suo. Cando fit sinzeru però fit balente cantu su mezus omime ’e bichinau. Male! Non si lassabat picare in ziru da-e nemmos! Anzis, sos ateros depian istare meda attenros- ca fit brulleri e roba ’e furca – pro non che rugher in carchi trassa mala. Comente da-e s’ispuntone ’e presone s’arziat a sa "Cudina", a manu
manca , b’haiat tres dommeddas chi fin una meravilla. Parian pintadas da-e un’inzienieri craparju, abituau a sas percas de su "Monte". Pro cussu che fin appirpirinadas supra ’e iscalinas e patieddos, chi parian domos de fadas. Ei sas fadas bi fin. Sa chi b’istabat in sa prima dommedda si nabat zia Tonia Busu ; sa chi fit a muru ’e mesu, zia Preduzza, s’atera, zia Rosa Boe. Su sero, in istiu, totas tres, settias in su patieddu prus artu, parian tres santas. Sas bichinas accudian a las intender ca fin unu mare ’e sapienzia. Semper prontas a dare bonos cunsizos a totus. Prus a zosso, sas domos de ziu Ocreddu. In intro, in cuchina , sa muzere , zia Zenia , una prenda ’e femina, semper frighende, abbattande, in faina . Haiat semper ite facher. Povera femina…pro si pasare tappulabat!
Ube commo b’est s’istancu, b’haiat una butteca ’e carzolaju ; azicu prus a dainantis, a manca, unu mastru ’e lamia, ziu Massazzi, a dresta, sa butteca ’e mastru Chessa, de su mastru ’e linna prus bonu ’e su mundu. Mastru Chessa, chimbant’annos fachet, fit bell’e bezzu : haiat una settantina ’e annos; ma traballabat chin forza e bona volontade, comente unu zovanu ’e leva. Fit unu bell’omine, semper bestiu ’e rusticu. Un’esempiu de sapienzia in cada cosa : siat in s’arte ’e mastru’e linna, siat in s’arte de imparare sa zente a diventare sapia e onesta. Fit meda relizosu. Crediat in Deus. Cad’annu, a Pasca, preparabat su sepulcru’e Santa Ruche. Zenìa ’e sepulcru! Fit semper su prus bellu de totus sas cresias de Nugoro! Su sero si leghiat una pazinedda ’e sa Bibbia. "Mi fachet bene!, nabat, "Est comente chi sia torrande a bier cosas suzzessas tantos seculos fachet, cando Deus, su mere ’e cada cosa, hat cominzau a facher su mundu!".
A s’atter’ala ’e su caminu, comente andamus a s’istassione bezza, sas domos de ziu Gabrielle Serra, e-i s’orticheddu postu a banda ’e palas, ube b’haiat una paja ’e murichessas chi haian sa bertude de facher sartiare mureddos e portales, cando in intro non b’haiat nemmos. Como in cuche, chi fit sa campagna chi si nabat "S’Aligurru", b’hat unu caminu, domos e palattos nobos. A muru ’e mesu a sas domos de ziu Gabrielle, su palatteddu de ziu Zizzitta Borghesi. Prus in goi, a cara a sa butteca ’e ziu Roffaelle, sa corte ’e Arzesa. Ah!, cussa fit sa corte nostra, sa corte de tottu sos pizzinnos de su bichinau. In cuche jocabamus a bardofula, a musa , a luna monta , a dominu, a bozza. Fit su rennu nostru. In cuche b’hamus prantu, risu, irgherremmiau. E hamus cominzau a sonniare, a fravicare casteddos de papiru, a imbentare tesoros e aschisorjos. In cuche Piero e Ughetto han incominzau a iscriver , chin su pensamentu, in sas pazinas mannas de su chelu, sos desizos abberaos solu a midade. Abberaos solu a midade ca ambos frades, pacos annos fachet, han depìu lassare custa cussorja pro andare pro semper a benerare, paris chin sos santos e-i sos anzelos de su chelu, sa bonidade divina coronada de isteddos e de amore profundu.
Argustos, puttos, carros, jubos fin s’anima’e sa bidda. Sa cresiedda ’e Santa Ruche fit su coro chi sas dominicas palpitabat de canticos de gosu.
Como, cando colo in cussu bichinau, in "S’Istrada", pesso totu custu. Ma bio unu mundu diversu. E non m’isco ispiegare su motivu pro su cale sas cosas prus bellas si sun sorbende che nudda, a dispettu de sos bonos sentimentos de sa zente chi nos han fattu mannos e ancudos.