Sas dies mi parian semper pius minores in cussu beranu faladu garrigu de bentu malu supra su chelu ‘e domo. Su tribagliu in frabica fit benende mancu, ma nemmos nos ischiat narrer su pruite. A sicunde chie sa neche fit de sos clientes, malos a pacare comente tzia Burica Pilicana, sa mama ‘e Toreddu Mossone, chi at galu a ischitare sos depidos de su ’15-18, cando curriat in sos guturos de Marisei chin sas mudandas de Andrianzela Sisina (comente chi in domo ‘e custa nd’ aren apidu de
suprapiusu tales de nche dassare peri a sos bichinos). Bi fin cussos chi naraian chi b’abiat pacu dimanda, ma sas nostras fini medas e nisciunu nos daiat cara; comente chi dae oje a cras nemos aret cherfidu pius a si tregher su “paneri” a pustis de aer fatu “cudda cosa”. Finis bi fit chie – su bonu – daiat sa gurpa a sos meres, a su sindacadu e a sa Regione: cussos sì chi neche nd’abiana... mancari Totoni Biancu, su sindacalista nostru, omine zustu, non s’abasciaiat a cussos jocos de cradea e de dinare. No mi mancaiat meda a sa pensione, e ja mi fipo bidende setzidu in sa piata ‘e Murmurisca faeddande chin sos omines postos de bonete chi abian galu ite contare supra sa gherra e de sos tempos chi sa gana nde lis manicaiat sos disizos. De tzertu muzere mea no m’abiat cherfidu in mesu ‘e pedes totu sa die... Ah... Muzere mea!... B’at unu mamentu in sa bida ‘e sas feminas chi las fachet mudare... non s’acatana mai bene, e paret chi sican s’andata ‘e sa luna: a urdos sun durches e ternurosas e ti cuntentan chin cada deliscia... e a urdos paren sùrbiles, istrias chi, si nois omines no istamus atentos, nos dan peri a diasupra. Nos dimandan de las cucuzare de afetu cantu mai nde lis amus dadu, de dare importu mannu a sos bisonzos insoro ca non si intendene bardadas e tentadas cantu dian cherrere. Ma si lis arreamus tropu acurtzu nos deretana, pristandenos comente fachen in bidda chin su cane ‘e Baulincu, chi andat dae janna in janna acapidande sas muras de pane fresa, allentadu dae s’umidescia, iscotzinadas su denotte pacu prima chi sas istearicas agabene de ammoddicare sas umbras chi treme treme si nd’isfachen in s’iscuru. Chie las cumprendet – custas feminas – est unu santu! Fortzis eo no lu so istadu meda chin muzere mea, finas si l’apo cherfida semper chin totu su coro; ma cussa cajone, cando istaiat gai... pro caridade! A bortas ghiraio a unu checheddu dae tribagliu e tando, a sas peleas de una die matanosa, s’ammuntonaian supra cussas de domo, e ateras milli fainas chi ora pro ora s’azunghian a sas chi non fipo galu resessidu a fachere. In piusu sos oriolos chi m’ammeraiat sa femina creschian die pro die e a urdos su dinare non bastaiat mancu a mantennere cussa puledda ‘e Martina, fiza nostra. Fit ja paritzu tempus istudiande in Casteddu pro si facher “dutoressa”, chene dare esames e gastande a dopiu de su chi resessio a li imbiare; nan chi fachiat sa “baby sitter” pro si pacare nessi sa domo. Sa paca de un’operaiu no est mai zusta pro sa faina e sas oras chi fachet: finas in custu su mundu girat a s’imbesse. Eo tribagliaio in d’una fabrica ‘e papiru igienicu e depio istare atentu a sa calidade de sos rotulos. Medas pessaian chi su laboratoriu meu seret su bagnu... chi mi depio setzer in cussa cradea codoma e istampada e chi mi seret tocadu de fachere su chi fachen totus... poberu eo si fit istadu aberu gasi! A cust’ora fipo istétiu consumadu comente sas peddes de Bobore Mustrencu, chi paret caminen a sa sola, totu pinnicadas e picioncadas che sa farda de Retore Cuiladu, chi juchet galu sas macias de ludu de cando nde fit rutu dae cabaddu a sa poja ‘e Pischina Mala sa die ‘e Santu Jacu. Su tribagliu meu fit diversu e infadosu meda. Cada tantu ‘e rotulos nde seperaio unu e depìo apompiare, chin sas machinas, si fit modde, biancu, liju o rasposu, dìlicu, si podiat tratennere sos bisonzos, si s’iscazaiat in s’abba e trinta e baranta. Sichìo sa produtzione ‘e sos rotulos dae su comintzu finas a cando non benian sos autistas de Marieddu Chentucarbones a nde los garrigare pro nche los jucher a mesu Sardigna. Chissai canta zente fachio cuntenta chin su tribagliu meu! Non b’at cosa gasi bella de si nde bocare unu dolore ‘e mata! Ma dolores de mata bi nd’at de tantas zenias... Finas sos collegas meos nde tenian unu. S’omine ja s’ischit ite chircat, e cussos marianes fin omines issos puru: calicunu cojadu, calicunu isposu e ateros bajanos, boes iscapos che cussos de Milleri chi agrucan su sartu chentu bortas sa die mentras su mere andat a s’infunder sas laras in s’iscopile de Minnia Lampiada, bida bida bajana e mama de deche fizos. E che su mere ‘e sos boes fin finas sos collegas; petzi chi issos non s’acuntentaian de Minnia Lampiada: chircaian tinteris pius “iscìques”, bennidos dae largu, inue infuder, finas a nde los bocare tiritiri, sos pensamentos insoro. Si parian in Parigi cando iscampiaian a cussos locos inue, inghelenados dae mustos, titas e licores, lis bidias sos canterjos chi s’allughian si benian cucuzados dae basos e carignos rumenos, polacos e nigheddos.
Ballaian sas tassas in cussas mesas de bridu e de rossetos, in mesu ‘e alenos de tabacu e de fiamas buddìas, chi fortzis arribaian cue deretas dae s’Inferru. Ballaian e brincaian mesu cubadas dae nues de fumos e vapores chi non si bidiana mancu in tzertos repartos de frabica. Ma sos fiacos de cussos seros sos collegas si nde los ghiraian a domo insoro, totucantos, e non bi pessaian mancu a si nde los iscotzinare dae supra prima ‘e si nde corcare, mancari chin chie fit abarrada ischida isetandelos.
Fini malos sos cossizos de cussas notes. Sos collegas non bi torraian in pessos; si nd’afutian, sichian a facher ballare sas tassas secus de cussos “separé”, e si a fine mese ghiraian a cubile chin su mesu ‘e sa paca fin cuntentos su matessi. No isco si lu fin peri sas muzeres. De custu no abiamus mai picadu allega... mancu cando Micheli Rodedda s’abiat acatadu, una de cussas notes malas, una paja ‘e valligias de cartone in foras dae sa janna. Issa fit istada finas de bonu coro a lias ammaniare.
Santinu Cagnulari puru, su gadduresu, chin sa roba perdendesi in domo sua (o fortzis compudada dae atere, comente naraiat carchi limba mala), andaiat a s’annidare in cussas butecas de biscios e iscascios, apentu malu pro cussos omines chi fin che puzones chi no acataian pius su ghiradorju.
Finas a tando non cumprendio pruite peri sos pius mannos de tempus, cojados che a mie etotu, fin pius cuntentos de colare unu sero muricande e ammanuncande coscias de late o de tziculate imbeve de si nd’abararre chin sa conca imbarada a sas petorras pienas e cajentes de sas muzeres, chi fin galu feminas bellas, disizadas puru dae carchi collega chi non juchiat galu pilos in canterjos. Non l’apo cumpresu finas a cando peri muzere mea no est ruta in cussos guturos tudos de su giambamentu chi a mamentos la fachiat a beru istare male. Sos collegas abian semper chircadu chin milli imboligos e trampas de mi trazare a cussas rebotas de siddados lichitos, a cussas butecarias de medichinas chi nan chi fin che sa Manu ‘e Deus; ma non fipo mai rutu in sos imboligos insoro.
Pessande a issos curriat che bundos in runda s’ammentu ‘e cussas bellas cambaradas de iberru de sos annos chi, a tropas isgatiladas, a pustis de boddas, tzilleris, murras e tenores, sa note si falaiat a Casteddu a facher isasciu. Ma como fipo creschidu; cussos fin ateros tempos. In domo abìo una sienda manna, totu su chi cherio, cussu chi sos ateros chircaian in sos isperdiscios de mesu mundu: muzere mea fit sa mere de una tanca saliosa inue in cada tempus podìo goddire sos menzus frutos de sa bida. Ma in d’una in d’una sa tanca pariat chi si seret sicada, totu a una borta. Sa femina, su tribagliu, e unu pacu finas sa salude, dae neche ‘e cussas titulias chi ponen pro incanire su papiru, non fin pius sos chi m’abian dadu gosos e cuntentos, chi m’abian torradu sa bida cando pariat chi mi nde seret fuinde dae poddiches. Su rellozu si fit arrimande. In pius juchio in concas semper s’oriolu ‘e fiza mea, chi mi fit ghetande s’isconnortu mescamente ca su dinare puru fit benende de mancu. Comintzaio a disizare sas buzacas de Luisi Palitostu, garrigas che su puleddu ‘e Chirielle Surbe e bundantes che sa funtana ‘e Gorgoreddu, chi in istìu puru bocat unu truntzu ‘e abba chi non s’aguantat sa manu suta. Una fiza de mantennere a tempos d’oje cheret narrere dolores. Cando in piusu ghiraio a domo istracu e acataio muzere mea gasi timio peri a intrare in janna. E tando.... E tando una borta – una borta solu, apo nadu intro ‘e mene – pruite non colare unu de cussos sero paris chin sos collegas? Chene tocare nudda, chene mancu apompiare... Zustu pro mi la bibere, bidu chi fit dae meda chi no intraio a tzilleri... Una borta ebbia...
Gasi apo comintzadu eo puru a ponner a ballare sas tassas (gasi naraian sos collegas si cherian a colare unu sero “diversu”). Iscampia oje e iscampia crasa, a sa fine nessi duas bortas su mese fimus abasciados appare in cussos divanos buddìos cantu su sambene nostru, chi pariat in cherta ‘e si nde essire dae suta sa pedde, de butare che a su late cando si nd’ofiat suta cussu pizu fine chi non resessit a lu tratennere piusu. Cussos seros pariat chi nos aren iscutos a catzotos: fimus semper carirujos che sos canterjos Bobore Poddine, su “minimu sindacale” de totu sos tzillerarjos de bidda.
Mancu sa crisi ‘e sa frabica nos abiat frimadu. Cando unu assazat unu cantu ‘e tziculate o de liquiritzia paret chi no nde potat pius facher a mancu: unu infatu ‘e s’ateru! Sun gasi bonos cando si nd’iscazan in buca! Carchi collega fit gasi gulaticu chi andaiat cada fine chida: intraiat a limba presa e cando essiat, arzillu che merula, la juchiat lùchida e isorta che a sa ‘e Marianna Cianciaramanna, femina ‘e bidda chi connoschet a totus e connota dae totus. Muzere mea imbeces mancu arribaiat a pessare su chi fipo fachende... Su chi li fipo fachende! Li naraio semper chi cada duas chidas, su chenapura sero, a pustis de una riunione sindacale semper longa e infadosa, si iscampiaiat a sa ‘e Maniscuta a manicare unu bucone e a su garagiu ‘e Jubanne Messadorju pro imparare a una paja ‘e piseddos, ischentes in frabica, a cantare a tenore. Su cuncordu cussos lu fin fachende abberu, ma in aterue, chin sos cumpanzos insoro (e finas chin carchi pisedda) e no abian bisonzu de intendere a nois, chi fimus fachende cantos e ballos de atera zenia. Naraio a muzere mea chi totu custu fit importante pro sa creschida ‘e su tenore in bidda, e issa ischiat s’importu mannu chi daio a custu cantu chi m’abian dassadu in erentzia sos parentes meos. Non tenio ateru disaogu, mancu su tzilleri sa dominica: su tenore ebbia. No ischiat, e mi doliat su coro su sapadu manzanu cando, belle a ora ‘e prandere, mi nd’ischidaio e andaio a la pinzellare totue chin sas laras, fachende sa mughida che unu gatulinu cando suet su late cajente dae sos tapijos amorosos de sa mama. Mi batian dolu cussos ojos de nuzola chi tenian galu sa secadura ‘e una diosa, e cuss’agherju innossente e timijolu, ispiju de un’anima chi cubaiat e costodiat un’amore illacanadu. Sos ojos meos imbeces, meres de unu segretu mannu pius de s’amore chi fipo dande a issa, fin nigheddos che sa note, che a cussas notes de turmentu malas a sessare, e ranchidos che su fele chi, cando bi pessaio, mi curriat in sas benas misciadu a unu sambene pudidu che su traghinu chi colaiat tempus fachet in su trighinzu ‘e Bisolae.
Fin ojos... bochidores!... “Acabadores” de unu sentidu chene agabu chi luchiat de ternura. Mi batian benenu cando, galu a illughinamentu, chircaio de los apompiare prima ‘e mi ghetare una junta ‘e abba in cara pro mi nde dogare dae supra s’ammentu ‘e sos sanietes de su sero prima, galu in fiazu dae sos chizos a sa buca e dae sa buca a sos chizos... ma fit malu a si nd’andare! Mi fachio ischifu a sa sola; m’intendio una gutia ‘e bodiu chi si crepaiat in su nudda. Non bi lia fachio mancu a mi fissare pius de unu sicundu; mi franghio finas a s’umbra mea matessi. Abio cherfidu a mi picare a iscavanadas cando mi fachio sa barba mentras, colandemi sa lameta in canterjos, mi bidio cue, secus de s’ispiju ‘e sa beridade; pro cussu nd’essìo che sa tanca ‘e Silipa, ube pariat chi seret colada sa gherra, totu bisestradu, ma non solu in cara: finas in petorras! Bascaramine!... Eo!... Mi bidio comente fipo... che a cussa cosa chi sos rotulos meos depian coglire...
Sos rotulos de papiru igienicu non sunu mai sos matessi. A sa zente paren uguales, ma in su tempus giambana ca in sos laboratorios b’at chie chircat semper de los mezorare azunghende o moende talco, luzana e ateras milli titulias. Gasi mudat finas sa manera de los produire e totora sas frabicas fachen unu pacu ‘e iscola pro chi sos operaios iscan comente giambare su tribagliu. Sa crisi e sa cuncurrentzia fin arribande a iscorjolare sas canneddas de sos meres mannos, chi tando abian detzisu de mudare sa produtzione proande a fachere una zenia ‘e rotulos pius barata; duncas nos tocaiat de falare a Casteddu a sa sede manna pro sichire un’iscola, chi duraiat una paja ‘e dies: sa jobia e sa chenapura. Totu cussa chida, finas a su merculis sero, unu pessamentu mannu m’at congiulidu e picadu a mossas s’anima: no ischio galu chin cale facia basare sa femina su manzanu, prima ‘e tucare, comente resessire a l’intingher chin sa limba cussa pedde galu modde e nuscosa de beranu, unu fiore chi si fit allizande ma chi teniat galu totu sos profumos, sos sapores e unu pacu ‘e sutzu garrigu de durcore. Comente mi nde so essidu? Unu basu ebbia l’apo dadu. Chene sentimentu.
Nde li fipo furande peri cussu, chi mai mi fit mancadu. Pario andandeminde in disterru (ube fortzis mi nde cherio andare abberu): sa valligia picada a trazu chin d’una manu, una paja ‘e chilos de pane fresa de jucher a Martina in s’atera. Depìo bider a fiza mea su sero etotu a pustis de s’iscola. Cando semus arribados a Casteddu fimus galu chin sas gherdas galu in ojos, e las amus mantesas finas a cando non semus essidos dae cussa aposentu inue bi fit un’omine in cravata faeddande e una trintina de caras de sonnu a cascios pessande a ateru. A corcare nos tocaiat de ghirare a s’albergo de Badore, unu nugoresu limbi-chichinu chi abiamus connotu carchi annu prima cando fimus falados pro un’atera iscola; secaiat sa mendula in culu, ma chi a su nessi fit curiosu che sa gana chi poniat a furriare sos rotulos chi fachio deo. Impenas agabada sa zorronada non so ghiradu a cue chin sos collegas ma mi so iserghidu chin su postalinu pro andare dae Martina chi istaiat acurtzu a Via Roma. M’abiat nadu chi m’atopaiat in s’istatzione. Faladu dae cussu accorru garrigu de contascias, de sudores e de zente istasida dae sa bida ‘e tzitade, unu raju ‘e luna at tintu de prata s’interighinada de una die finas a tando chinta de istrachidughine e de paraulas nadas a su boidu. Ite bella fiza mea!
Un’incantu che a s’isteddu chi essit su sero innantis de sos ateros! Una mazine! Pilos longos e pìchidos chi parian de seda, fines e dilicos che sos de una jana tessidora. Cussu sero li basaian sos rujolos chi juchiat in canterjos e chi la fachian lampizare cando ridiat chin cussos ojos ispapillos chi mi nde manicaian de amore, nigheddos e luchidos chi parian duas sabecias. E ite durcore cussas laras de pessiche e de mele, vellutu mai basadu o cucuzadu dae pizos e tintas de peruna zenia! Mi parian sas de muzere mea, cussas chi a manzanu abio impenas tocadu e chi como, bidende a fiza nostra, fipo disizande. Juchiat unu golficheddu fine chi aizu li cucuzaiat su petus chi bartare cantos piseddos abiat bantzicadu e ninniadu in durches inghelenaduras agabadas in sas pumas cosidas dae sas mamas. Juchiat una carena ‘e modella, una bellesa rara chi Deus at intregadu solu a pacas. Una pintura!... E sos tacones chi juchiat la creschian pius de su metro ‘e otantachimbe chi tiraiat.
Zeniosa e durche cantu una lacrima ‘e mele... fit fiza mea! Bella che a sa mama! Si abiat apidu istudiadu unu pacu piusu fit istada una prenda in totu. Impenas m’at bidu mi nd’est brincada a supra cucuzandemi de afetu chi pariat s’anzoneddu ‘e Mascariota, chi totus lu juchian che cateddu. Mi nd’at interradu de basos e carignos, ispertandemi chin cussas manos de printzipessa, lijas e friscas che sos cavanos de una rosa, chi nd’abian ammachiadu e iscazadu finas sas predas. A pustis chi l’apo dadu su pane fresa, unu pacu pistadu dae sos istripitos ch’abiat fatu mustrandemi cantu mi cheriat bene, m’at dimandadu si cherìo a colare in domo sua a picare su café, nandemi chi peròe non mi podiat mantennere a chenare ca depiat istudiare chin d’una cumpanza. Non bi so andadu, finas ca depio torrare in presse a s’albergo a mi sapunare e a manicare, ca poi a pustis... bi fit su ballu ‘e sas tassas. Unu basu ebbia a issa puru, in cavanos, prima ‘e torrare a cubile.
Aciopadu appare chin mecus in s’aposentu fit Bantine Teracu, su capu-repartu de sa “linea A”. Isse fit unu de cussos chi abiat fatu s’abbonamentu a sas iscurritzadas de sa chenapura. Biancu imbeces, mancari no aret tentu nen Deus e nen santos (e mancu bi los timiat), no nd’abiat mai cherfidu intender s’ascurtu de benner chin nois, e su sero est abarradu in su ‘e Badore chin Chicu Sabidoria a narrere ‘abulas, a chie la contaiat pius madura... e su bellu est chi si las credian issos puru! Ballallois!... mesu macos ma persones de gabbale, tocat de lu narrere, pienos de difetos ma amicos de coro. Essidos dae s’albergo a brente boida, nos semus imberghidos in d’unu tzilleri, ube amus finas manicadu una paja ‘e cocones chin grandula a testa (mancari, cherende, su mere nos abiat pacadu sa chena in s’albergo) e semus abarrados cue finas a tardu. Cando semus essidos, chin totus sas abbentadas de su tzilleri in gropera e in sa beste, Jubannicu Misone, andande tasta tasta in d’una contonada, s’est incrunadu e nch’at bocadu a foras s’ortaliscia ‘e una chida. Fit a unu brodu, non si repiaiat mancu in sa padedda! E nois, macos deretos, fimus ponende infatu a isse! Ca nan chi ischiat a ube nos picare... E ja l’ischiat!...Lampiadu! Ja fit ladinu chi connoschiat sos guturos de Casteddu comente su sartu ‘e Orilao, inube dae minore e finas a cando est intradu in frabica abiat fatu su teracu de sos Merulas, sos meres mannos de bidda.
A sa prima pariat chi seremus intrande a sa cantina ‘e Antiocheddu Messacambeddas, ube bi sun galu sos matessi tallaranos chi abiat dassadu su babu sa die chi abian getadu sa soleta, cando si nde fit cotu a una santa lallara e non resessiat mancu a picare in manos s’iscopa. Jumpadu cuss’angrone a fiacu ‘e lanedda bi fit un omine mannu de carena chi nos at pedidu unu bellu tantu ‘e dinare pro nos dassare colare. In cussu locu sì chi nos la salian sa pala! Fit totu caru che su focu ch’abiat tentu sas canneddas de Andriana Malistrita cando si nde fit inghelenada in su fochile de Bore Cariasa, chi sa die dopo s’est tucadu che-i su fumu ca azumai sa muzere non si lu jocaiat a tiros de sartaghine (chin sa prima garriga de ozu buddìu!)... B’abiat zente meda, setzida totue, e piseddas de cada colore, totu culi-nudas e trassadas. Fit pro comintzare unu “jocu” in cussa ispetzia ‘e caminera chi agabaiat in d’unu palu nigheddu, ma nois nos semus aposentados pius a largu. Fimus in sete. Impenas seperadu sos divanos, chi parian sos sediles de su postale ‘e Totoi Michessa, sun bennidas a si setzere chin nois tres pandeleddas: duas pili-brundas, biancas che nibe, e una nigheddutza chi Jubannicu at tentu deretu picandesila a sa coda e dimandandela de nobas. Supra ‘e mene s’est imbarada sa pius istrizile de cussas duas brundas, chi podiat aere non pius de bint’annos. Pariat unu sole... chi mi fit cochende tropu. Ma non mi nde l’apo iscotzinada. In su mentres Bantine fit mutinde pro ghetare a bibere, gai si podiat comintzare chin su ballu ‘e sas tassas. A cada giru chi beniat fatu (semper de birra), una borta bufadu totu, una pisedda depiat artzare a supra ‘e sa mesa e ballare finas a cando una tassa non rughiat a terra. Su mere ‘e cussa tassa, chi su bonu ‘e sas bortas l’aciapaiat prima chi seret ruta a beru e chi si seret secada, nde beniat bocadu a foras dae su jocu pro sos giros chi si mutian a pustis. Si sichiat gasi, unu giru infatu ‘e s’ateru, finas a cando no abarraiat una tassa solu: sa ‘e su binchidore. Su premiu fit una mes’ora, pacada dae totus sos ateros, de colare in secus de sos separé, in cussu chi cheriat issu. A mie non mi fit mai tocadu; solu una borta fipo arribadu a mi la jocare umpare chin Titinu Supera e chin Tatanu Logostrai, ma cust’urtimu pudiat a bentu fritu e non dassaiat tretu a atere. Cando liu amus dimandadu, Tania – gasi si mutiat cussa bella brundedda chi m’est setzida a sa coa – si nd’est pesada, s’est iscurtada, est artziada a supra ‘e sa mesa e at comintzadu, moendesi che una turturedda in beranu, a facher su primu ballu. Tremiat sas nadicas comente una de cussas brasilianas chi essin a carrasecare, e s’oju ‘e calicunu s’est puntu cue. Jubannicu, chi fit peleande a l’apompiare in suta sa gunnedda, astrinta che a Badore su ‘e s’albergo, s’at coglidu unu bellu carche a murros propriu in su mentres chi sa tassa sua nd’ est ruta a sa moquette, chene si secare. A pustis de s’ateru giru est artziada a ballare cussa nigheddutza, chi a istripitos sas tassas las fachiat brincare. Sa ‘e Santinu at fatu finas su cucuritu prima de nde finire a terra. Bibe ca ti bibo, chene cumprender pius nudda, so arribadu a sa fine ‘e su jocu chene mancu m’abizare chi abio bintu. Fortzis mi fipo perdidu apompiande cussas pitzocheddas e su manizu insoro: picaian a bibere “isciampagnes” e incioroddos chi bi cheriat bator oras de tribagliu pro los pacare; impenas los ponian in laras. Brutaian solu sas tassas, pintandelis cussos murros rujos chi a calicunu fachian ismenticare sos basos de sas muzeres; e cussu manzanu deo mi nde fipo fuidu dae sos de sa mea. Eo abìo a issa, una domo, e fipo cue, che unu driollo, dassandeminde manicare sos ojos, su dinare e su coro. Ma custu mi nde l’apo ismenticadu deretu cando Bantine m’at chintu sas palas e m’at nadu de seperare a ube cherio intrare. B’abiat semper una paja ‘e separé inube si gastaiat a tres tantos de sos ateros; cue non bi baliat a seperare sa cumpanza, ma in intro s’acataiat “su menzus” chi unu podiat disizare. Sos ateros separé fin pro intrare chin sas pitzocas chi benian a si setzere a sas mesas e Titinu, agabadu su ballu, no abiat isetadu mancu a nde finire sa tassa pro si nde tzacare in cue, chin Tania. Apompiandemilu in su mentres chi, ghetandeli sa manu a paneri, l’acumpanzaiat a secus de sa tenda pro ponnere a ballare ateru, apo torradu a pessare a muzere mea.
Issa sì chi ischiat a m’acuntentare in totu. Fit issa sa menzus cosa chi podio disizare abberu... Ma non bi fit... Podìo essere in su letu ‘e s’albergo, bijonande de la jucher abratzada e chinta a sas petorras... Ma fipo cue, muscadu pius dae sos pessamentos chi si perdian intro sos sonos de bridos e de apeddos gurdos chi non dae su bibinzu. Fipo solu in mesu ‘e totu cussa zente, e mancu eo matessi resessio a mi facher cumpanzia. Como fit su cherbeddu meu chi ballaiat umpare a cussas titas apoddicadas dae chie fit disizande de las imprateare chin mossos e lintas totu sa note.
Illibrinidu dae sos oriolos, pro carchi sicundu mi nde so istadu de apompiare su chi fit a innantis meu. Non bi lu cherìo facher. Abio tiradu una tenda, che a cussa de sos separé chi furriaian in tundu a mie, pro m’imbelare sos ojos. So restadu che isantaladu, comente chi sere intro una bijone fea.
Pariat chi mi nd’aren secadu sa conca e chi l’aren posta a torulare in d’unu tremene tudu pro chi seret finida innedda dae su coro. In sa boveda bidio pintadas farfaruzas de unu chelu istratzuladu chi mi nde fit rughende supra. M’intendìo tentu a unu morotulu ‘e tallaranos, chin d’unu fiotu ‘e ragnos chi mi cheriat facher a cassola; no ischìo mancu cales fin sas cadenas chi mi mantenian presu a cuss’imboligu. Non bi resessio a m’ischidare. Abio bintu, ma ite? E a cale fit su preju?. No ischìo pius nudda, non fipo cumprendende nudda... finas a cando Santinu non m’at picadu a bratzete e mi nch’at jutu, belle a trazu, a innantis de duas jannas chi s’aperian a su passadissu ‘e s’Inferru.
Cussa jobia, in cussas aposentos de piacheres ammajadores e malos a cubare, tribagliaian solu “tapijos licanzos” e “sa mere mala”, lumenes chi trubaian sa fantasia ‘e s’omine in tancas chi non connoschian lacanas. A pustis de mi l’aere pessada unu pacu apo seperadu de intrare a ube bi fit sa “mere mala”, finas ca dae s’atera aposentu un’urdu prima abio bidu essinde unu titule chi fachiat ischifu a sos porcos. Nan chi m’iscudiat e mi probaiat sos chircios naraian sos collegas chi si la fin
ridende secus meu. Ma sas francadas de astragu de custa femina chi mancu connoschio no m’assustaian pius de cussas chi m’abiat apidu iscutu muzere mea si abiat ischidu. Apo chircadu ‘e non bi pessare. So intradu a s’aposentu tremendemi che canna, chene ischire si fit dae su timinzu o dae sa gula. Abìo belle fritu, fipo a titias. Su sambene si fit ghelande, ma in carchi tretu ‘e sa carena l’intendio galu a furriu, comente chi seret andadu a si seperare cussos zassos chi nd’abian pius bisonzu. Non b’abiat nemmos in intro. A destra, in su muru, b’abiat duas loricas chi mantenian una paja ‘e cadenas de atzarju chi parian frabicadas dae mastru Nunzio, frabilarju de manos bonas chi tribagliande su ferru pariat fachende casu. In mesu, arrimados in d’una isdraja ‘e pedde nighedda, bi fin unu nerbiu e una ispetzia ‘e foete. A manca bi fit unu letu; in supra ‘e custu fin arrimados unu fuste e una paja ‘e ferros che a cussos impreados dae sa giustiscia. In fundu si bidiat una janna. Fipo isetande chi luego dae cue seret intrada custa mere mala. Time-time mi so acortziadu a cue e apo bidu chi sa mere abiat atacadu a sa maniglia unu cantu ‘e papiru chi juchiat iscritu: “inizia a spogliarti che sto arrivando”. Non l’abio bene letu chi, chene ischire mancu comente, fipo ja in mudandas, setzidu in d’unu mesicheddu postu a costazu de s’isdraja, apompiande sa janna in s’isetu chi seret intrada. Juchio su coro chi cheriat a brincare a foras, chi mi nde fit essinde dae su gurguzu; sos tocheddos parian su tumbarru ‘e Tziu Sementa, chi a Santu Jorzi lu fachiat currer che su caddu ‘e Tèbele cando mughiat piughere a totus in sa garrela ‘e su Pesperu. In d’una in d’una apo intesu sas tràchidas de cussa janna chi si fit aperende. Su sonu fit che a su ‘e sos ossos de Badoranzelu Gula chi, cando artziaiat in s’iscala ‘e cresia, parian ghetados a sa machina ‘e sa zarra. “Milla intrande mi’!” apo nadu in intro ‘e mene. “Comente at a essere?” Est intrada a bellu a bellu, de palas, prima chin d’un’anca, cucuzada fintzas a ghinujos dae un’istivale nigheddu, ammustrandemi sa coscia, bianca e tosta chi batiat gana de b’afundare sas dentes. Duncas nd’at intradu su bratzu, cubadu finas a su cubidu dae unu guante de seda nighedda; lu tremiat, dilicada che una reina, dae artu a bassu e dae bassu a artu comente chi seret carignande a lepiu cuss’aghera chi si fit ja allughende. A la bider gasi depiat essere manna e ancuda, una bella femina. Est intrada unu pacu pius e l’apo bidu s’ischina, nuda, supra sa cale, moende a furrios sa conca, at fatu falare chin galania sos pilos in colore ‘e note. Sos ojos meos si sun firmados unu bellu urdu apompiandeli sas nadicas, chi non bidio s’ora ‘e carignare e de ammoddicare; luego an a essere istetias totu meas! Fit jocande e ballande cue, in s’oru ‘e sa janna, e deo fipo che mortu in cussu mesicheddu isetande chi si seret bortada e mi nde seret brincada a supra, in cussu letu ‘e bambache imbaradu a su muru. Como fit in intro ‘e su totu, e fit totu pro mene... Bartare dae ube beniat! Fortzis lu podìo comprendere apompiandeli su colore ‘e sos ojos. Ma non si fit galu bortada. Fit arta, bene fata, licanza, sexy chi non de podiat piusu, e mi fit dassande chene prumones e chene oriolos. At artziadu sos bratzos e l’apo bidu in manos unu pannitzu nigheddu, longu; fortzis fit pro mi lu ponner in ojos e comintzare a jocare. Tando at comintzadu a segheddare su paneri e sas ancas, dantzande chi pariat una ninfa bessida dae sas poesias de Sumidda. Eo fipo cue, chin sa salibedda in buca, a limba in terra, manicandeminde pessamentos e afetos. Non b’abiat pius locu pro muzere mea. Nde fipo leadu dae cussa creatura: fipo totu pro issa. S’est bortada, a bellu a bellu... e.... m’est arrimadu su coro, m’est mancadu s’alenu, mi nche sun girados sos ojos a secus, m’est asciutada sa buca, mi so teteradu, illibrinidu, fatu biaitu.... e issa puru.... Martina! Ite bella chi fit!... Fiza mea...!

Primo Premio al 1° Concorso di Letteratura Sarda "Pabàriu" di Paulilatino