Su 27 de abrile de su 2021 Giuanna Ledda at coronadu unu sonniu chi l’est costadu annos de trabagliu e de chirca in una materia no fatzile , comente cussa de indagare sa cultura, sa limba e sa poesia in Sardigna in sos annos duros chi ant sighidu sa fine de sa segunda gherra mundiale.
Considerende su periudu de arretradesa e de povertade cuasi generalizada de s’isula nostra, inue sas netzessidades materiales fint su contivizu primariu de sas familias , ocuparesi de problemas culturales no fit tzertu in sa mente de sa mazore parte de sa zente sarda.
Ma una creschida materiale no est possibile sena una creschida morale e culturale.
E gai, in sa mente de pagos cultores e amantiosos de sa limba e de sa poesia sarda, comintzat a si formare s’idea de criare una rivista literaria, inue sos sardos si poterant cunfrontare cun elaborados propios, contos e poesias, chi fit una cosa amada meda e prejada dae totu su populu sardu.
Tra cussos sonniadores, unu de sos printzipales est istadu tiu Anzeleddu Dettori, originariu de Bonorva ma residente in Cagliari. Si podet narrer chi tiu Anzeleddu, dae sa naschida, si siat alimentadu de sa poesia de su poeta zigante bonorvesu Paulicu Mossa, connotu in onzi parte de Sardigna e giamadu su printzipe de sos poetas sardos pro sa delicadesa e sa bellesa de sas poesias suas.
Cun custa garriga poetiga chi teniat in coro, tiu Anzeleddu cun pagos amigos resessit a realizare cust’idea , e fundat una rivista poetiga in gradu de unire totu sos sardos amantes de sa poesia in una virtuale domo comuna. E gai in su 1949 benit a sa lughe sa rivista S’ISCHIGLIA.
A sa morte de tiu Anzeleddu Dettori, S’Ischiglia passat in manos de Aquilinu Cannas, chi s’afiancat de unu giovanu universitariu, Gavinu Maieli, chi nde diventat tra sos redadores su pius ativu e premurosu, puru cando firmat sa rivista Antoninu Rubattu dae su 1991 finas a sa serrada sua.
Custa rivista, unica in su genere sou, tra periudos fortunados e varias pausas arrivit a essere imprentada, gratzias a sa costantzia, a s’amore e a sa determinatzione de custu pius giovanu redadore chi at tentu, poi de sa morte de tiu Anzeleddu Dettori, s’amigu e poeta Gavinu Maieli, chi, dae su 2012, che l’at giuta in formadu cartaceu finas a s’annu 2014, pro nde sighire poi s’imprentadura in formadu online.
In S’Ischiglia si sunt formados totu sos poetas chi dae una conditzione de carattere paesanu ant leadu respiru e ant fattu fagher a sa poesia sarda unu saltiu de calidade tantu de la render in gradu de cumpetere cun poesias e poetas de cale si siat ateru logu, sena esser segunda a peruna currente culturale presente in sa fine de su seculu XX.
Fra totu sos cullaboradores cherzo ammentare sos pius in vista, dae Pedru Casu a Antiogu Casula, comente sos nuoresos Frantzischinu Satta e Giuanne Piga. Sos Logudoresos Antoninu Rubattu, Antoni Palitta, Foricu Sechi, Salvadore Corveddu, Giuanne Fiori, in tataresu Salvador Ruju, Remo Branca, Nino Fois. Ma b’est rapresentada sa Gaddura cun poetas de rangu comente Giulio Cossu. In sa faeddada campidanesa agatamos a Benvenuto Lobina, Aquilinu Cannas, Luiginu Cocco, Efisiu Collu.
Unu rendicontu cumpletu lu faghet Guanna Ledda, chi analizat annu cun annu totu sos numeros de sa rivista, cun una cantidade impressionante de operas in poesia e in prosa.

Ma chie est Giuanna Ledda, e comente mai est arrivada a tratare de S’Ischiglia in una tesi universitaria?
Comente ateras mizas de giovanos at devidu lassare sa Sardigna, si est trasferida a Milanu inue at agatadu trabagliu, cussu trabagliu chi sa Sardigna no resessit a dare perdinde goi sas mezus mentes chi poiant opeare unu riscatu socialee e materiale e aviare s’isula nostra in unu percursu de modernidade e de serenidade. E tando pedimos a Giuanna de nos contare calchi cosa de custa magnifica impresa chi at afrontadu e nd’est essida binchidora.

“” Sono nata a Cagliari nell’ottobre del 1986 e sono cresciuta a Gesturi, un piccolo paese della Marmilla. Dopo la maturità scientifica conseguita a Isili (nel mio paese non ci sono le scuole superiori e bisognava viaggiare tutti i giorni a Isili), all’età di 19 anni mi sono trasferita a Cagliari per iscrivermi all’università.
Inizialmente mi sono iscritta nella facoltà di scienze politiche, ma la mia passione per la letteratura e la linguistica mi hanno portato a fare un passaggio (subito al termine del primo anno accademico) nella facoltà di “Lettere” con il corso in Lingua, cultura e storia della Sardegna” Durante tutto il percorso di studi, ho svolto alcuni lavoretti come baby sitter, pulizie e ripetizioni, bisognava pur pagare l’affitto della casa che condividevo con altre studentesse e pagare le tasse universitarie.
Nel frattempo ho seguito il corso della lingua dei segni italiana (LIS) per le persone sorde.
Conseguita la laurea triennale in Lettere, mi sono iscritta alla laurea magistrale di lettere in “Filologie e letterature classiche e moderne” ma la mancanza di lavoro iniziava a farsi sentire e nel 2017 mi sono trasferita a Milano, dove ho iniziato a lavorare come assistente alla comunicazione per le persone sorde, a scuola.
Nel frattempo ho continuato a studiare e mi recavo a Cagliari per sostenere gli esami all’università.
Ho escluso fin da subito la possibilità di fare un passaggio di Ateneo dall’università di Cagliari all’università di Milano, in quanto ci tenevo a completare il mio percorso di studi a Cagliari dove tutto è iniziato.
Ho scoperto dell’esistenza di S’Ischiglia durante la stesura della tesi triennale, sulla figura di Aquilino Cannas e in seguito, con il mio relatore, abbiamo deciso di approfondire la storia di S’Ischiglia nella tesi magistrale.

Custa giovana neoduttora Giuanna Ledda, pro presentare e discutere sa tesi sua de laurea, s’agatat in manos una cantidade de materiale impressionante, pro su numeru mannu de sos autores chi in custu periudu ant produidu mizas de operas, - una variedade de cuntzetos e de argumentos chi andant dae sas oberas simples de poetas artesanos o massajos a cussas de personas de alta cultura.
Totu custu no assustat a Giuanna Ledda chi cun abilidade e metodu e bona capatzidade comintzat a sudivider su trabaglliu segundu s’ordine temporale, in su cale bessit e s’isvilupat onzi numeru de sa rivista, e nde sighit passu passu s’evolutzione contendende onzi progressu finas a sos ultimos numeros de s’esistentzia sua.

Mi sento in dovere de ringraziare custa giovana atzuda, Giuanna Ledda, pro su trabagliu meravizosu chi at fattu e chi, isperamos chi potat esser sighidu dae ateros giovanos chi, arrivende a su traguardu de sa laurea, tenzant contu de sa pretziosa cultura sarda e contribuant a la mezorare.
M’iscuso cun Giuanna Ledda, ca, deo, essende s’unicu ancora in vida chi at connotu e cullaboradu cun totu sas ediziones de S’Ischiglia, podia faeddare de issa dae su primu comintzu finas a s’agabu e li devia fagher custa presentada apenas laureada. Ma una serie de circustantzias negativas mi l’ant resu impossibile.

Aranova su 10 de lampadas de su 2022