|
Su Pastoreddu dell'amico Giovanni Piga
Non lu ponet chin Deus, Luisa Musina, ca su fizu. Franzischeddu, fachet su pastore e cada borta chi ghirat a los bier e a si cambiare sa roba, non fachet lana meda in dommo sua; mancu si bortat, s'ora 'e pedire 'e nobas e de si saludare sos cumpanzos e torrat a tuccare derettu. Tottu custu a sa mama li secat su coro. Ca siat issa che su maridu Predu "E Jana", haian fattu sonnios mannos supra sua, si haiat istudiadu. Ma s'appricu 'e Franzischeddu, da-e minore, fit pro su campanna e punnabat, a su puntu chi non pariat mancu unu pizzinnu 'e commo. Sa Mama, pro sussu, cada borta chi li torrat, chin sas presses de su mundu, si nde pranghet che a oje, ca s'ammentat tottu custu. Istaban (e istan galu) in s'oru 'e sa bidda, fachende cara a su monte 'e Deunisi, in custas de su cale bi paschiat unu tazu 'e ziu Paddeu, su pastore, fit un'isparta 'e ancas. Franzischeddu, impessu chi ghirabat da-e iscola fughi-fughi, imbolabat sos labareddos in d'un'oru, si piccabat unu cantu 'e coccone a mossos e ghettabat che frizza, in s'andatta predosa chi nche dabat a su pinnettu 'e su cubile. Fit ingulumau ca ziu Paddeu, li dabat su poleddu e lu mandabat a nche bortare sa robba e deppoi li fachiat cumpannia, e li fit imparande su manizzu; siat a murgher, che a facher casu. Tottu custu a su pizzinnu l'aggradiat. A su puntu chi si piccabat a coro sos anneos de cudd'omine. Unu sero, est ghirau atturdiu e no' hat cherfiu mancu a chenare, cosa chi non fit usuale suo, sa mama, ca l'hat connottu a sa gherju chi non fit a su solitu. L'hat dimandau si s'intendiat male, ma Franzischeddu non hat rispostu nudda. - Mancu male nessi!, Chi commo ti piccas sa parte manna puru, pustis che mancabas tottu su bortaedie! Dassa ghirare a babbu tuo dassa c'has a bier! - Su pizzinnu, anziat sos ocros prenos de luche, Pompiat in cara sa mama .. - Ma! , Non m'intendo male e non mi cherjo piccare mancu sa parte manna! So' pezzi disoiachiu ca a ziu Paddeu si l'hat mortu una berbeche anzande! - - Ih E tue ite li faches? No' est mancu gurpa tua no! Aite ti la depes piccare a coro! Pessa chi depes facher su' iscola pessa, ch'est ateru che berbeches! - - Bois nazes gai! Ziu Paddeu est poveru est, e cussa zicca li fachet farta li fachet! Allischies chi non juchet piuncos in pedes? Los juchet imbolicaos chin duos curriolos de istrazzu arragaddau ..! Si mi la habazes dada carchi paja de cussos chi non ponet babbu, cras che lios haia jutos! - Dassami sa conca in pasu dassa! Commo happo 'e pessare a sos males anzenos puru .. ! Ja bastan sos meos de dannos .. ! Cola e piccati su libru cola prima chi ghiret babbu tuo! - l'hat rispostu issa irfadada. Un'ateru bortaidie fit za'intrighinande e Franzischeddu fit galu a recuire, oramai fit cosa 'e cada die. Sa mama, iscretia manna, fit zubilande da-e supra 'e su montricu chi muttiat semper. Ma sas boches suas, rimbombande in sas trempas de sa badde, che torraban in secus a cabaddu 'e sas umbras de su sero, che lamentos e tunchios de animas in pena. Ma issu non s'aiat in locos. Est tuccau su babbu, cabd'est ghirau da-e su traballu, a lu chircare a ube pessabat de l'accattare, nechidau che berre. L'haiat addobiau in sa caminera, ghirande, illibrinau 'e su frittu e e tristu chei sa notte chi fit falande da-e sas intrannas de sa die chi fit dande sas urtimas saludadas. Oramai fit iscuru 'e su tottu. Su babbu, impessu si l'hat sapiu, l'hat muttiu da-e largu, chin chischiu, pro non l'assustrare. - Franzischè! Tue ses fizu mè! - E' Dego so' eh! - Rispondet, timorosu 'e lu brigare. - Aite fis galu a ghirare! Non l'has intesa a mama tua, chi fit tottu su bortaidie a coches, muttinde a tibe! - Ca s'est morta s'anzonedda ba'! S'anzonedda chi hat pesau pro mene ziu Paddeu! Si l'hat zocada mariane!; dua si nd'hat zocau, ca si nch'est azzocchiau a s'annile istanotte colada! - Iscappat a prangher a suppeddu chin s'amore e s'innossenzia chi frorit in sos primos dech'annos de sa bida. Predu 'e Jana si bocat sa zanchetta e lia ghettat in coddos a su fizu e attrempande, a s'iscuru, in su pettorru 'e dommo sua li nat de bonu grabbu: - Eitte cheres facher deddè! In campanna suzedin custas cosas, mascamente cando non b'hat aggorru bonu, pro reparare sa robba da-e traschias e da-e sa rusta chi trabicat su denotte! Ma tue coro me' non ti picches pessamentu pro custu no! ca ses minore ses! E bi depen pessare sos mannos a custas cosas, sos pastores! Tue ses biddaresu e ses andande a iscola! Cando ses mannu e istudiau, non ti nd'has ammentare prus: de mariane; de s'anzonedda e mancu 'e ziu Paddeu, ca des haer ateras cosas, tando 'e pessare. - Ma Predu 'e Jana no' aiat galu cumpresu, chi sas cosas pro issu usuales, fin'arande, chin s'arbada 'e su sentimentu, sos beraniles de su coro 'e su pizzinnu, in sas tulas de s'anima. - Bois faveddas gai, ca no'ischies ite cheret narrer sa bida 'e sa campanna, su disisperu 'e unu pastore, cando si biet sos sudores suos pistaos da_e sa "fera"! E oje, ziu Paddeu, pezzi chi non s'est postu a pranghe chin mecus, ca est sa'e tres bortas, custu mese, chi l'hat dadu it'a facher su balente! E si sichit gai, hat nau chi a s'inghiriu 'e s'annu che lu torrat a bidda a facher cumpannia a sos zillerajos!. E dego non cherjo chi suzzedat custu! Ca m'est imparande totu su manizu! All'ischies chi connosco ja sos sinnos de sa roba e isco murgher e deppoi . . . bi! Biende lu seziscustu! - Li mustrat unu muruttuleddu, chi juchiat astrintu a su pettus che ricchillia, in su cales b'haiat unu punzichedd'e casu friscu galu sucuttande coru a sa coa 'e sa zanchetta inghisia èe beranile. -Custu l'happo fatto dego! E all'ischies ite m'hat nau ziu Paddeu? chi nanchi happo una bona manuza e chi mi sò fachende unu bonu pastore! E chi, si m'aggradaiat, fra carchi annetto mi nche piccabat chi ussu! E a mimme ja m'aggradit da' e luego non ti torro prus a iscola ca cherjo facher su pastore! - A Predu 'e Jana, l'han barbattau su coro, cussas paragulas innidas, caentes, inturtadas de candidos sentimentos innossentes. - - Su sero li 'hat contau a sa muzere e pro cante non de l'hat costau cosa cando hat intesu sas ideas chi juchiat su fizu. - Sa notte non han tancau ocru, ambos e duos, graminandesi totu custu. -Franzicheddu fit su primu 'e sos mascros. E issos l'haian chei sa pupia sìocru, ca, mancari sanu, fit dilicheddu e bellicosu chia pariat una pintura. Juchiat sos ocros in colore 'e chelu. Una conca 'e pilos chi pariat una tula 'e labore, ingraninde, in su mese 'e lampadas. Sonniaban cosas mannas pro issu. Non de lis hat colau mai in cherbeddos de si lu bierène pastore un'incrasa. Cherian chi esseret istudiau; chi s'esseret piccau unu diproma, o si Deus cheriat, peri sa laurea. Issos fin dispostos a facher cale si' siat sacrifiziu, bastante chi esseret istudiau; ca juchiat finzas s'aghera 'e su sennore biddaresu. - Ma Franzischeddu, juchiat ateros contipinzos in conca. Sos annos fin colande serenos s mudos unu iffattu 'e s'ateru, piccandeche impettus medas cosas: paragulas bodias, sonnios, impinnos iscròmpios e frores de ideas chi non sun resessios s chivare. Ma sas ideas de Franzischeddu 'e Jana, non si sun cranucadas a s'imberta 'e su tempus. Anzis.... - Orammai fit omine. In cussos annos colaos, Franzischeddu, hat istudiau; istudiau e imparau parizas cosas: in s'iscola 'e su sartu, chin su "mastru" Paddeu. E commo est pastore 'e beru, in totu; in su limbazu; in su pessare; in su coro; in sas frogheddas de s'anima, ìnnida 'e perunos males. Sa campanna est jocu pro issu. Sas berbeches, sos anzones, sas tuppas, su chelu pintau in ocros... est jocu totu custu pro issu. E, iddattu 'e sa gama, in sas tancas apertas.... chene lacanas, chin su sole in cherbeddos, chin su risu in sas labras, a trabicu, cantat a sa natura carchi muttu 'e amore:
Oje, Franzischeddu hat bint'annos. Paret una pandera, unu lizu 'e oro, prenu 'e salude: Ch'est in sos sartos de Tula, a unu chin d'unu ziu suo, fradile 'e sa mama, a pustis de tres annos chi est istau chin ziu Paddeu, in sos passibales de Gavoi. Est cuntentu 'e s'arte ch'est fachende, Est cuntentu, ca si sun abberaos sos sonnos chi fachiat a cabaddu 'e su poleddu, furriandeche sa roba da-e s'oru 'e sa "linia 'e su trenu" in su "Monte Deunisi". Ma non gai sos sonnos de sa mama, chi no' han fattu a tempus a chivare. A dolu mannu suo chi si nch'est mesu dirutta da-e su dispiachere. Non si cheret rassinnare e bastu. Est totucanta sa die, peri oje, comente a cada borta chi ghirat, precandelu che Santu a si nche ghiraret a bidda 'e su totu. Issu mancu ca li fit intendende. Fit ammaniande sos trasticheddos ca haiat pistichinzu 'e tuccare. - Franzischè! aite no' abbaras chi ja est galu chitto! cando torras? - Commo non d'isco ma'! est cominzande a anzare sa robba e b'at ite facher meda, ma bois non bos picchedas pessamentu, chi dego ja isto bene! - E comente dìat esser a non bi pessare fizu me'! ... aite chi non ti nche ghiras a bidda, chi babbu tuo ja ti lu buscat su traballu. L'han impinnau chi ... - Hoi na'! - li nat Franzischeddu - commo no' istedas chin sa solita istoria! orammai l'ischies chi m'aggradit a facher su pastore e bastu! e deppoi... cale traballu? ite mi nche ghiro a facher si de zovanos che a mimme bind'hat a milliajas chene facher nudda, contande sas lastras de su cursu cada die! Abutinandesinche chi sun bumbu, chircande su schissiu 'e sa droga. Pizzinnos de nudda! chene s'ausiliu de una misera zorronada, chin sas buzzaccas prenas de... impinnos 'e paragulas bonas....! Menzus a non de sichire a faveddare ma'! Non bos cherjo mancu intender supra 'e custu.... corte chi Deus m'hat dau s'appricu a sa campanna di no...! asiu hai' appiu 'e chircare e de facher su prantone, installau die-die. in dainnantis de su "bancu 'e Sardinnia"! Istae .. istae ca mi nch'ando ca ziu Franziscu est solu e no' accudit a su manizu...! Adiosu ma'! Dego so' andande! Ja no' happo a istentare a bi torrare. Saludademi a babbu e sas carrales, cando ghiran da-e s'iscola! Adiosu!. - Sa mama no' hat appiu arcàda 'e li rispomder. hat cumpresu chi su chi lhat nau su fizu, fit sa nuda e cruda realtade, chi non si podiat mudare chin su sentimentu 'e su coro. Franzischeddu, si l'abbrazzat, l'astringhet forte e li basat sas massiddas, iffustas da-e sas lacrimas mudas chi li fin istuppande da-e sa bena 'e sos ocros. Si ghettat sa zanchetta in supra 'e su coddu, si chinghet su bonetteddu 'e belludu, chi pro cante non si bidiat in cussu mare 'e pilos chi juchiat, in conca, e s'abbiat, a passu lestru, a su dovere e chin pupias ridende a sa bida, chin s'animu serenu, si la cantat cuntentu, andande-andande:
- Bae chin Deus, fizu me', bae! - rispondet Luisa fachendeli 'e manu - bae chin Deus! issu tìaccumpanzet sos passos a cad'ora!. ======= Giovanni Piga, poeta e scrittore affermato, con questo racconto ha vinto il secondo premio del concorso Amsicora nel 1982 a Bolotana. |
|||||||||
| COSTANTINO LONGU | FRANCESCHINO SATTA | POESIAS SARDAS | CONTOS | POESIE IN LINGUA ITALIANA |
